С.САРУУЛ

Иргэний нийгмийн байгууллагуудын оффшорын эсрэг тэмцлийн уриалгаар өнөөдөр /2017.03.31/ ард иргэд төв талбайд цуглаад байна. 12:00 цагаас эхэлсэн жагсаалд иргэд нэмэгдэж ирсээр Сүхбаатарын талбайг тэмцлийн уухайн дуу, иргэдийн жагсаалаар дүүргэв. Оффшорчдын эсрэг нэгдсэн хөдөлгөөнд иргэний нийгмийн байгууллагуудаас гадна МАХН, Нам бусчуудын хөдөлгөөн зэрэг улс төрд суудалтай болон суудалгүй намууд нэгджээ. Жагсаалд Иргэний нийгмийн байгууллагуудын төлөөллөөс гадна Ардын уран зохиолч Т.Галсан,  УИХ-ын гишүүн асан З.Баянсэлэнгэ, Г.Уянга нар хүрэлцэн ирж оффшорын эсрэг дуу хоолой хүргэсэн юм.

Жагсаал зохион байгуулагчид Монгол Улсад нүүрлэсэн өрийн дарамт, ядуурал ихэссэнээс нийгэмд хүнд нөхцөл үүссэнийг иргэдэд танилцуулж,  Ерөнхийлөгчөд Үндэсний аюулгүй байдлын зөвлөлийг яаралтай хуралдуулах шаардах бичиг, УИХ-д оффшор данстай улстөрчдийг шалгуулах тулган шаардах бичиг хүргүүлсэн. Төр, засагт сануулга болгож уриалгын төсөл бичсэн. Энэ Монголын ард түмэнд хандахаас гадна НҮБ, Монголын төрд хандсан уриалга. НҮБ-ын Авлигын эсрэг, Үндэстэн дамжсан мөнгө угаах санхүүгийн гэмт хэргийн конвенцид Монгол Улс энэ хоёр хуулийг хэрэгжүүлэхгүй байгаа тухай хандсан уриалга гаргаж буйг хөдөлгөөний ерөнхий зохицуулагч С.Батчулуун хэлсэн юм.

Гэрэл зургийг Д.БАТБААТАР

Эх сурвалж: www.polit.mn