Х.УРАНЦЭЦЭГ

Нийтийн тээврийн автобусанд ирэх сарын 1-нээс зөвхөн картаар үйлчилж эхлэх талаар Нийслэлийн тээврийн газрын орлогч дарга Г.Доржпалам, “Улаанбаатар смарт карт” компанийн захирал Ц.Түвшинжаргал нар мэдээлэл хийлээ. Өнөөдрийн байдлаар Улаанбаатар хотын хэмжээнд нийтийн карт цэнэглэх, борлуулах 451 цэгээр иргэдэд үйлчилгээ үзүүлж байгаа бөгөөд нийтийн тээврийн үйлчилгээний цагийн хуваарьтай уялдуулан өглөө нээх, орой хаах цагийг уртасгах талаар шаардлага тавьж тухайн цэгүүдийн үйл ажиллагаа нэгдсэн байдлаар шалгах ажил зохион байгуулагдаж байгаа гэлээ. Картуудаас хязгааргүй зорчих эрхтэй, сарын хугацаатай карт нь том хүн 25 мянган төгрөг, хүүхэд 8000 мянган төгрөг болон шинээр үйлчилгээнд гаргасан бөгөөд иргэд тухайн картуудын “Улаанбаатар смарт карт” компаний хэрэглэгчийн төв болон Дүнжингарав, Мишээл, Драгон нийслэл үйлчилгээний нэгдсэн төвүүдээс авах боломжтой аж. Мөн “Хаан” банкны гаргасан нийтийн тээврийн бусад төлбөр тооцоонд ашиглах боломжтой “СИТИ касс” карт Юнителийн хэрэглээнд NFC сим карт ашиглах гар утасныхаа сим картыг солиулан нийтийн тээврээр зорчих боломжтой юм. Авто тээврийн хяналтын улсын байцаагч нарыг хуваарь гарган дундын хяналтаар ажилуулах бөгөөд зорчигч нийтийн тээврийн үйлчилгээний хөлсөө төлөөгүй зорчсон тохиолдолд  Авто тээврийн тухай хуулийн дагуу иргэнийг 1000-5000 төгрөгөөр торгох арга хэмжээ аван үйл ажиллагаа явуулах юм байна. Нийтийн тээврийн газраас нийт иргэд зорчигчид та бүхнийг хуулийн дагуу үүргээ биелүүлэн эрхээ  эдэлж хамтран ажиллахыг уриаллаа.

Эх сурвалж: www.polit.mn