Т.САЙХАН

Гавьяат багш М.Цэрэнхандын нэрэмжит Нийслэлийн техник, технологийн 23 дугаар олимпиад “Ган зам” 20 дугаар сургууль дээр өнөөдөр /03.30/ боллоо. Уг олимпиадад багш, сурагчид технологи зураг зүй, техник спорт, дүрслэх урлаг, дизайн гээд нийт 12 төрлөөр өрсөлдөж буй юм.  Олимпиадад өрсөлдөж буй багш сурагчдын 600 орчим  бүтээлийг олонд дэлгэн танилцууллаа.  Энэ үеэр “Ган зам” 20 дугаар сургуулийн багш  Н.Отгонцэцэг “Энэ жилийн олимпиадад техник загварууд түлхүү орж ирж байна. Мөн эмэгтэй сурагчид маань хувцасны дизайн чиглэлд гайхалтай уран бүтээл хийдэг болжээ. Ер нь жил ирэх бүр хүүхдүүдийн маань бүтээл мэргэжлийн төвшинд ойртож байгаад баяртай байна” гэж байв.  Тухайн олимпиадын технологийн төрөлд  роботууд сонирхол татаж байв.  Тэнд байгаа роботууд юм цуглуулж, зөөж буулгах ажлыг гүйцэтгэж байна.  “Сурагчдын маань  бүтээлүүд их шинэлэг болжээ.  Техник технологийн эрин учраас дагаад бид хөгжиж эх орныхоо энэхүү чухал салбарыг авч явах ёстой юм” хэмээн зочин шүүгч Ч.Лодойравсал хэлж байв.  Авто загварын уралдаанд оролцогч сурагчид өөрсдийн хийсэн машинаа удирдан, бартаат саадыг давж, өгөгдсөн даалгаваруудыг биелүүлж байсан юм. Цаанаас өгсөн  удирдамжийн дагуу автомашины загвараа гаргасан байна. Тиймээс хүүхдүүд уг загварын машиныг дуурайлган машины гаднах загвар, араа, хөтлөгч, суудал, дугуй, бүр хаалганы бариул, хөдөлдөг толийг нь хүртэл хийсэн нь сонирхол татаж байлаа. Алсын зайнаас удирдах удирдлагатай, тоглоомон машинаас эд ангийг нь авч, машиндаа ашигласан тохиолдолд оноо хасагддаг болохоор хүүхдүүд машиныхаа бүх эд ангийг өөрсдийн гараар хийдэг нь тэдний техник сэтгэлгээг хөгжүүлэхэд түлхэц хэмээн зохион байгуулагчид онцолж байна.   Ийнхүү нийслэлийн техник технологийн 23 дугаар олимпиадын нэгдсэн дүн ирэх сард  гарах бөгөөд шалгарсан багш, сурагч Улсын технологийн олимпиадад оролцох эрхтэй болох юм байна.

Гэрэл зургийг Д.БАТБААТАР

Эх сурвалж:www.polit.mn