Г.ЖАРГАЛ

Үндэсний статистикийн хорооноос Олон улсын хөдөлмөрийн байгууллагатай хамтран энэ өдрүүдэд “Хөдөлмөрийн статистикийн олон улсын шинэ стандарт” сэдэвт уулзалтыг зохион байгуулж байна. Энэ талаарх зарим зүйлсийг Үндэсний статистикийн хорооны Хүн ам, нийгмийн статистикийн газрын ахлах  статистикч Э.Гантуяагаас тодрууллаа.

-Манайд мөрдөгдөж байгаа хөдөлмөрийн ямар статистик байна. Шинэчлэх шаардлагатай юу?

-2013 онд гарсан олон улсын шинэ тогтоол өөрөө хөдөлмөрийн статистикийн гол үзүүлэлт болох ажилгүй иргэд, ажилгүйдлийг илэрхийлж байгаа тоон үзүүлэлтийг бүрэн гаргаж ирэх, шинэ төвшинг бий болгож өгснөөрөө онцлог юм. Манай улс энэ шинэ стандартыг зайлшгүй мөрдөх шаардлагатай. Одоогоор манай улсад 2009 онд хөдөлмөр, нийгмийн хамгааллын сайд, үндэсний статистикийн хороо хамтран баталсан статистикийг мөрдөж байгаа. Бид шинэ стандартыг дагаж мөрдсөнөөрөө ажил­гүйдлийг, ажилгүйдлийн төвшингөөр нь тогтоож байгаа. Мөн хөдөлмөр эрхлэлтийг  дөрвөн төвшинд илэрхийлэн гаргаж ирснээрээ ажилгүйдлийг бүрэн гаргаж ирэх, мөн ажил эрхлэлтийн хэлбэрүүдийг тооцож гаргах боломжтой болно.

-Монгол Улсын хөдөлмөр эрхлэлтийн нөхцөл байдал ямар төвшинд байгаа талаар мэдээлэл өгөхгүй юү?

-Үндэсний статистикийн хорооноос хийсэн ажилгүйдлийн судалгаа байдаг. Манай улс өөрөө хөдөлмөрийн зах зээл дээр ажлаасаа шалтгаалан өөрчлөлттэй гарч ирдэг. Сүүлийн жилүүдэд ажилгүйдлийн төвшин тогтвортой буурах хандлага харагдахгүй байгаа. Тиймээс бид 19 дүгээр бага хурлын тогтоолыг мөрдөх хэрэгтэй. Хөдөлмөрийн зах зээлд хөдөлмөр эрхлэлтийн ашиглалтыг бүрэн эрэлхийлж гаргаж ирснээр бодлого боловсруулагчид, судлаачдад бүрэн мэдээлэл өгөх боломжтой болно.

Эх сурвалж: www.polit.mn