Ц.ЭНХТУНГАЛАГ

“Бяцхан мисс” улсын уралдаан өчигдөр  Хүүхдийн урлан бүтээх төвд эхэллээ.  Уралдаанд нийслэлийн цэцэрлэгүүдийн авьяаслаг багачууд идэвхтэй оролцож байна.  “Бяцхан мисс” олон улсын хүүхдийн байгууллагын менежер Т.Саруултуяа “Манайх “Бяцхан мисс” уралдааныг 15 дахь жилдээ зохион байгуулж байна.  Энэ жил Гүрж улсын Батуми хотод зохиогддог Дэлхийн миссийн тэмцээний 2015 оны тэргүүн мисс Ц.Мичидмаа, Сувд нарыг явуулахаар бэлтгэж байна.  Тэмцээнд шалгарсан хүүхдүүдэд маш олон боломж гарч ирдэг.  Тэргүүн мисс болохоос гадна кинонд тоглох, олон улсын тэмцээнд оролцох зэргээр өөрийгөө нээж хөгжүүлэх боломжтой болдог” гэв.

Тухайлбал 2015 оны тэргүүн мисс Ц.Мичидмаа охин “Аз жаргал”, “Орхидос” киноны гол дүрд тоглож байжээ. Энэ жилийн уралдаанд нийслэлийн 236, 50, 33, 67, 70, “Мөрөөдлийн хотхон”, “Амида”, “Эрдэм”, “Оюунлаг багачууд” зэрэг 20 гаруй цэцэрлэгийн 4-6 насны охид оролцож байна. Энэ нь “Бяцхан мисс”  уралдааны эхний шалгаруулалт бөгөөд гала тоглолт ирэх тавдугаар сард болж титмийн эзнийг шалгаруулах юм байна.