Т.САЙХАН

Хээ хуар болсон хувцас, бүргэд, доомборын эгшиг, тулам булаалдах тэмцээн  гээд үндэснийхээ уламжлал хэв маягийг хадгалсаар ирсэн казах түмний “Наурыз”-ын баяр өчигдөр тохиолоо.  Жил бүрийн гуравдугаар сарын 22-н буюу өдөр, шөнө тэнцэх энэ өдөр казахууд өвлийг өнтэй давсны баяраа тэмдэглэдэг.  Өчигдөр цахим ертөнц казах түмнээр “гоёж”, энэ зон олонд хаягласан мэндчилгээгээр дүүрэн өнжлөө.   Төрийн гурван өндөрлөг болон УИХ-ын гишүүд, Нийслэлийн удирдлагууд гээд бүхий хүмүүс казак түмнээ хүндлэн баярын мэндчилгээ илгээж байв.  Энэ  “Наурыз”-ын баяр жил ирэх бүр өргөн дэлгэр болж буйг илтгэж байлаа.  Мөн цахим ертөнцийнхөн казах түмний үндэсний хувцас, тоглоом наадгай идээ ундааны талаар ярилцаж, “Таньдаг  айлдаа очиж каз иднэ ээ. Тэр заавал уух ёстой шөл нь ямар амттай вэ” гэх зэргээр ихэд сониучхан өнжив.  Казын тухайд хүн бүхэн мэднэ. Харин шөлийг нь “Наурыз-көже” хэмээх нэрлэдэг юм байна.  Энэ нь шөл нь баяр баясгалантай, азтай, цэцэн, эрүүл, элбэг дэлбэг, хурдан шаламгай, өсөж үрждэг, бурхнаас өршөөлтэй байх гэсэн утгыг илтгэдэг гэнэ. Ийнхүү казах түмний “Нарны баяр”-аа идээ ундаагаар элбэг дэлбэг, тоглоом наадгай,  дуу хууртай сайхан тэмдэглэн өнгөрүүллээ. 

Эх сурвалж: www.polit.mn