Б.ЗАЯА

УИХ-ын намрын чуулганаар батлагдсан Цагдаагийн албаны тухай хуулийн шинэчилсэн найруулгын эх бичвэрийг цагдаагийн байгууллагад гардуулах ёслол өчигдөр боллоо. Ёслолын ажил­лагаанд УИХ-ын дарга М.Энхболд, ХЗДХ-ийн сайд С.Бямбацогт, Хууль зүйн байнгын хорооны дарга Ш.Раднаасэд, ЦЕГ-ын дарга, цагдаагийн хурандаа Ө.Энхтөр нарын Засгийн газар, УИХ-ын гишүүд, цагдаагийн байгууллагын удирдлагууд оролцов.

Цагдаагийн албаны тухай хууль гурав дахь удаагаа шинэчлэгдэн батлагдаж буй юм. Анх 1993 онд Цагдаагийн байгууллагын тухай хууль батлагдаж байсан бол 10 жилийн дараа буюу 2003 онд шинэчлэн найруулж Цагдаагийн албаны тухай хууль болгон баталсан. Тэгвэл энэ удаагийн шинэчилсэн найруулгад ихээхэн өөрчлөлт орсныг салбарынхан онцолж буй. Тодруулбал, цагдаагийн албан хаагчийн нийгмийн асуудлыг сайтар тусгаж өгсөн. Хүнд нөхцөлд үүрэг гүйцэтгэдэг ал­бан хаагчдын цалин­гийн урамшууллыг Хөдөлмөрийн тухай хуульд заасан үндсэн цалингийн 40 хувиас хэтрүүлэхгүй байх зохицуулалтаас тусгаарласан. Түүнчлэн замын хөдөлгөөний зохицуулагч, гүйцэтгэх ажилтны ажилласан хугацааг нэмж тооцох буюу нэг жилийг 1.3 жилээр тооцох, Тахарын албанд ажиллаж байсан албан хаагчдын цолтой холбоотой зохицуулалтыг тусгаж өгсөн билээ.

Ийнхүү цагдаагийн байгууллагынхны дунд хүлээлт үүсгээд байсан хууль мөрдөгдөж эхлээд зогсохгүй, хуулийн эх бичвэрийг Цагдаагийн ерөнхий газрын Ёслол, хүндэтгэлийн танхимд хүндэтгэлтэйгээр заллаа.