С.САРУУЛ

Баруун-Салаа, Халдвартын чиглэлд үйлчилж байсан УБГ-3671 улсын дугаартай автобус өнөөдөр /2017.03.21/ Сансарын тунелийн зүүн талд шатсан хэрэг гарсан. Тэгвэл энэ талаар албаны хүмүүс мэдээлэл өглөө. Нийслэлийн Тээврийн газрын дарга Д.Отгонбаатарын хэлснээр шатсан автобусанд 6-7 хүн зорчиж явсан бөгөөд ямар нэгэн байдлаар гэмтсэн, угаартсан зүйлгүй. Мөн автобус нь 2016 оны тавдугаар сард Монгол Улсад импортоор орж ирсэн шинэ автобус байжээ.

Чингэлтэй дүүргийн Онцгой байдлын хэлтсийнхэн есөн минутын дотор очжээ. Энэ талаар Нийслэлийн онцгой байдлын газрын Гал түймэртэй тэмцэх хэлтсийн дарга дэд хурандаа Н.Нямхорлоо “Бие бүрэлдэхүүн очиход тухайн автобус хүмүүсээ бүрэн буулгасан, хөдөлгүүрийн хойд хэсэг болон бүхээгийн хэсэгрүү гал түймэр тархсан байдалтай байсан. Тухайн гал унтраах анги 20 минутад, 30 литр хөөс ашиглан галыг бүрэн унтраасан. Ямар шалтгаанаар шатсаныг 14 хоногийн хугацаанд гаргана. Урьдчилсан байдлаар хөдөлгүүрийнхээ хэсгээс гал түймэр тархсан байна гэсэн эхний шинж тэмдэг илэрсэн” гэлээ.

Эх сурвалж: www.polit.mn