Т.САЙХАН

Казах түмний нарны баяр маргааш тохионо.  Баярыг угтсан үйл ажиллагаа өчигдөр Монголын залуучуудын холбооны өмнөх талбайд боллоо. Казах зон гэрээ барьж, идээ будаагаа дэлгэн зочдоо урьж  дайлав. Энэ удаагийн баярын хүндэт зочид нь академич А.Бакей, УИХ-ын гишүүн  Г.Тэмүүлэн,  Н.Учрал, МЗХ-ны ерөнхийлөгч А.Мөнхбат нар байлаа.  Энэ үеэр Баян-Өлгий аймгийн Залуучуудын холбооны тэргүүн Б.Ербулан “Казах хэлэнд “Наурыз” гэдэг үг олон түмний баяр цэнгэл, байгаль дэлхий өвлийн нойроос сэрж, өдөр, шөнө тэнцдэг өдөр хэ­мээх утга агуулдаг. Аливаа үндэстний уламж­лалт баярт тухайн ард түмний соёл, зан за­н­шил хадгалагддаг. Ийм ч учраас 2009 онд ЮНЕСКО-ийн мате­риаллаг бус соёлын өвд казахчуудын Наурыз баярыг бүртгэсэн юм” гэлээ.  

Наурызын баярын өдөр айл болгон хоол унд элбэг дэлбэг бэлтгэж, бие биедээ зочилж, дуулж хуурддаг байна.  Мөн бие биедээ “Улыс он болсын, ак мол болсын” гэж ерөөн мэн­дэлнэ.  Хүүхэд залуус нь үндэсний тог­лоом тоглож, эр­чүүд нь “Көкпар” буюу тулам булаалддаг байна.  Өчигдөр болсон өдөрлөгийн үеэр доомбор эгшиглэж, казак түмэн үндэсний ая дуугаа эгшиглүүлэв.  Мөн  казах эмэгтэйчүүдийн хатгасан уран нарийн хийцтэй гэр ахуй, гоёл чимэглэлийн хэрэгсэл, хувцас эдлэл хараа булааж байв.   Ийнхүү казах түмэн гэрээ барьж, хүндэт зочдоо идээ будаагаараа дайлан дуулж хуурдан нэг өдрийг өнгөрүүллээ.