Л.ХЭРЛЭН

Сонирхогчийн боксын спортын ОУХМ, Рио 2016 зуны олимпийн наадмын  V байрын шагналт Э.Цэндбаатар өнгөрөгч бямба гаригт буюу энэ сарын 18-19-нд шилжих шөнө бусдад зодуулан хүнд гэмтэл авч  ГССҮТ-ийн Сэхээн амьдруулах тасагт хүргэгдсэн ч биеийн байдал тун хүнд байна. Боксын шигшээ багийн тамирчид ирэх дөрөвдүгээр сард болох Тайландын Эзэн хааны цомын тэмцээнд оролцохоор Цагаан сарын дараачаас “Хандгайт” дахь  спорт цогцолборт бэлтгэлд  гараад байсан юм. Энэ сарын 18-19 амралтын өдөр таарсан тул тамирчид амрах хуваарьтай  байсан ч  хүмүүс амарсан  шөнийн  цагаар /02:00/  бэлтгэлийн баазаас гарч хотын төвд ирэн цэргийн баяр тэмдэглэх үеэр бүлэг залуус ирж өдөж хоргоосон байна. Тэднээс зугттал араас нь автомашинаар хөөн улмаар Э.Цэндбаатарыг мөргөж гэмтээснийхээ дараа  зодож танхайрсан хэргийг Баянгол дүүргийн цагдаагийн хэлтэс  шалгаж  байгаа аж. Холбогдох газруудаас мэдээлэл авахаар хандахад Баянгол дүүргийн цагдаагийн хэлтэс “Хэрэг мөрдөн шалгах явцад мэдээлэл  өгөхгүй”, ГССҮТ-ийн Сэхээн амьдруулах тасгийн эмч нар “Өвчтөний биеийн байдлын талаар зөвхөн ар гэрийнхэнд нь цаг тутам мэдээлж байгаа” гэсэн хариуг тус, тус өгөв. Иймд  Боксын шигшээ багийн ерөнхий дасгалжуулагч Д.Батсүрэн, Э.Цэндбаатарын анхны багш, дасгалжуулагч, ОУХМ Б.Энхтайван нартай холбогдлоо.

Д.Батсүрэн: Э.ЦЭНДБААТАРЫН БИЕИЙН БАЙДАЛ ХYНД БАЙНА

-Боксын тамирчдад, тэр дотроо залуу тамирчин Э.Цэндбаатарт  хүнд зүйл тохиолдсонд харамсал илэрхийлье. Та бүхэн ар гэрийнхэнтэй нь ойрхон байгаа байх, биеийн байдал нь ямар байгаа бол?

- Нүүрэндээ олон оёдол тавиулсан. Биеийн байдал хүндхэн байгааг эмч, ар гэрийнхэн нь ярьж байна.

-Уучлаарай, таныг гавьяатын найр хийж бусад дасгалжуулагч нартайгаа архидаж байсан  гэх  мэдээлэл зарим эх сурвалжид гарчээ. Гэтэл тэр өдөр та докторын ангийнхантайгаа сургалтад хамрагдаж байна гээд лекцэнд сууж байгаа зурагаа цахим хуудастаа оруулсан байсан. Энэ хоёр мэдээллийн аль нь бодитой вэ?

-Би гуравдугаар сарын 18-нд хотын төвд ирж докторын ангийнхантайгаа хамт Аяако багшийн лекцэнд суусан. Тэр хойгуур ийм үйл явдал болжээ.

-Бэлтгэлийн баазад хэдэн дасгалжуулагч тамирчидтай үлдсэн юм бэ?

-Бааз дээр найман багш тамирчдынхаа хамт үлдсэн юм. Гэтэл тамирчид шөнө цонхоороо гараад явчихсан байсныг дасгалжуулагчид хэлж байна. Тэд үүрээр буцаад  ирнэ гэсэн тооцоотой шөнийн 02:00 цагт гарсан бололтой.

Б.ЭНХТАЙВАН: ЭЭЖ НЬ УТСААР ЯРЬЖ ХЭЛСЭН 

-Таны шавь Э.Цэндбаатар хүнд гэмтсэн юм байна, та очиж уулзав уу?

-“Хандгайт” руу бэлтгэлд гарчихсан байсан. Тийшээ гарна гэдгээ  утсаар хэлсэн.  Би өөрөө бие тааруухан, сүүлийн үед эмнэлгээр яваад байгаа болохоор  боксын спортоос ч,  тамирчдаасаа ч   хол байгаа. Тийм болохоор сая  юу ч мэдээгүй. Ээж нь өчигдөр /уржигдар/ утсаар ярьж дуулгалаа. Эмнэлэг орж хараахан амжаагүй явна.

Үйл явдлын мөрөөр Монголын боксын холбоо хоёр өдөр хуралдсаны эцэст өчигдөр орой шийдвэрээ гаргав. Боксын шигшээ багийн нэр бүхий зургаан тамирчныг “Хандгайт” дахь бэлтгэлийн баазаас буулгаж, 14 хоногийн зардлыг өөрсдөөр нь төлүүлэхээр болсон байна. Мөн Э.Цэндбаатар, Х.Энх-Амар, Г.Баярхүү нарыг Үндэсний шигшээ багаас зургаан сараар (3.20-9.20 хүртэл) хасчээ. Энэ хугацаанд тэд улсын зардлаар тэмцээн уралдаанд оролцох эрхгүй юм.