С.САРУУЛ

 Байгаль орчин, аялал жуулчлалын сайд Д.Оюунхорол /2017.03.16/ өчигдөр  Хан-Уул дүүргийн XIII хороо, Туул тосгонд ажиллалаа. Шувуун фабрикын  нутаг дэвсгэрт хайрга, дайрга олборлодог 60 гаруй аж ахуйн нэгж үйл ажиллагаа явуулдаг. Энэ нь байгаль орчин болон иргэдийн аюулгүй орчинд сөргөөр нөлөөлж байгаа юм. Карьерүүдийн үйл ажиллагаанаас болж голын ус ширгэж, бургас цөөрч гол гольдрилоо өөрчилсөн. Малын бэлчээргүй, хадлангийн талбайгүй болсон. Ухсан нүхэнд мал унаж үхэж байна, хүн явахад хэцүү болсон. Тоосжилт ихтэйгээс харшлын өвчтэй хүний тоо нэмэгдэж байна, хайрга ачсан том оврын тэрэгнүүд зам эвдэж, автын осол гарах нөхцөл бүрдүүлээд байна зэрэг хүндрэлтэй асуудлыг уулзалтын үеэр үг хэлсэн хүн болгон хөндсөн байна. Мөн  Засгийн газраас тодорхой шийдэл хүлээж байгаагаа хэлжээ. Энэ үеэр Д.Оюунхорол сайд “Карьерийн аж ахуйн үйл ажиллагааг цэгцэлнэ, хаах шийдвэр гаргана. Ингэхдээ тухайн аж ахуйн нэгж ухаж сэндийчсэн, хүн, мал унахаар болгосон газрыг нөхөн сэргээлгэнэ. Нөхөн сэргээлт эс хийвээс эрүүгийн хэрэг үүсгэж шалгуулна.Айл болгон хашаандаа мод тарих хэрэгтэй гэсэн иргэний саналыг дэмжиж байна. Энэ хаврын мод тарих үндэсний өдрийн өмнө шувууны иргэдэд мод үнэгүй олгоно. Энэ бол шувуун фабрикийг цөлжилтөөс аврах гол ажил юм. Бизнес эрхэлж байгаа нэрээр хууль дүрмийг уландаа гишгэж, нийтийн эрх ашгийг хохироож байгаа үйл ажиллагааг таслан зогсооно. Иймд энд карьерийн үйл ажиллагаа эрхэлж байгаа бүх аж ахуйн нэгжийн лицензийг цуцалж, эдгээр аж ауйн нэгжээс нөхөн сэргээлт хийж, газрыг бүрэн бүтэн болгож өгөх шаардлагыг хатуу тавина” гэв.

Эх сурвалж: www.polit.mn