Ширээний ном

Т.БАТСАЙХАН

Биеийн тамир, спортын газрын дарга Ц.Шаравжамцыг “Ширээний ном” булангийн зочноор урилаа.

-Таныг түүхийн ухааны магистр цол хамгаалсан гэж сонссон.  Ер нь ном хэр уншдаг вэ?

-Ажлаа аваад удаагүй байгаа болохоор ном сөхөх зав гарахгүй юм. Саяхан салбарынхаа 10 орчим журмыг шинэчлэн баталлаа.  Мөн хуулийн төслөө өргөн барьчихаад байна.  Ажил ихтэй ч хааяа түүхийн ном эргүүлэх дуртай.  Ялангуяа Чингис хааны түүх миний сонирхлыг татдаг . Одоо ширээн дээр маань XIII зууны үеийн монголын түүхтэй холбоотой хоёр ном байна.  Харин хувийн номын санд минь Чингис хаантай холбоотой 20 орчим бүтээл бий.  Уран зохиолын номноос гэвэл хамгийн сүүлд “Чонон сүлд”-ийг уншиж дуусгасан.

- Ном уншихын ач холбогдол таныхаар юу вэ?

 -“Ном бол ертөнцийн харах  цонх мөн” гэдэг үг хуучраагүй, үнэ цэнээ алдаагүй байна.   Унших тусам хүний оюун ухаан тэлдэг.   Ялангуяа түүхийн ном хамгийн үнэ цэнэтэй нь  юм. “Түүхээ үл мэдвэл мөхлөө үл мэднэ” гэсэн үг бий.  Монгол Улсын түүхийн сайн муу, алдаа оноотой зүйл нь юу байв.  Энэ бүхнийг  дэнсэлж чадвал ирээдүйгээ харж чадна.  Ер нь хүн алдаагаа  аль болох давтахгүй байхыг хичээдэг. Тиймээс түүхээс сурч мэдэх зүйл их бий.

-Сүүлийн үед олон янзын утга агуулгатай ном гарч байна. Та юуг нь харж сонголтоо хийж байна вэ?

-Зохиолч, номын агуулга үнэ цэнийг харж сонголтоо хийх дуртай.  Мөн юу уншихыг хүсч байна тэрнээс шалтгаалан ном худалдаж авна.   Түүнээс биш номын сан бол хогийг сав биш шүү дээ. Олдсон таарсан бүхнээ аваад байдаггүй. 

-Ном бүтээх нь энэ насны нэгэн буянд тооцогддог. Танд  өөрийн автортой ном гаргах бодол бий юу?

-Байлгүй яахав.  Эхний ээлжинд сагсанбөмбөгөө бичмээр байна. Сагсанбөмбөгийн сүүлийн 20 жилийн түүх надтай салшгүй холбоотой. Би энэ л салбарт амьдарч эд эс нь болж явсан, одоо ч хэвээрээ. 

Мөн Чингисийн түүхийг судалж байхад Жамуха миний сонирхлыг нэлээд татсан. Тиймээс энэ түүхэн хүний тухай зохиол бичнэ гэж боддог.