Б.ЗАЯА

Авлигатай тэмцэх газраас бондын хөрөнгийн зарцуулалттай холбогдуулан УИХ-ын гишүүн асан Н.Батбаяр, Б.Гарамгайбаатар нарыг баривчилсан. Тэднийг цагдан хорих хугацаанд Б.Гарамгайбаатар батлан даалтад гарах хүсэлтэй байгаагаа илэрхийлж, өлсгөлөн зарласан тухай мэдээлэл гарсан юм. Тэгвэл Нийслэлийн прокурорын газраас Б.Гарамгайбаатарыг цаашид цагдан хорих шаардлагагүй гэсэн үндэслэлээр таслан сэргийлэх арга хэмжээг өөрчлүүлэх саналыг шүүхэд гаргажээ. Баянзүрх, Сүхбаатар, Чингэлтэй дүүргийн эрүүгийн хэргийн анхан шатны шүүхээс уг хүсэлтийг өчигдөр хэлэлцэн Б.Гарамгайбаатарыг батлан даалтад гаргасан байна. Хэдийгээр түүнийг батлан даалтад гаргасан ч хэрэгт яллагдагчаар татагдсаныг эх сурвалж хэлэв.

Харин Н.Батбаярын хувьд сэжигтнээр цагдан хорих таслан сэргийлэх арга хэмжээ авсан хугацаа нь өнөөдөр дууссан. Прокуророос яллагдагчаар цагдан хорих таслан сэргийлэх арга хэмжээ авах хүсэлт шүүхэд ирүүлсний дагуу өнөөдөр 15:00 цагаас шүүх бүрэлдэхүүн хэлэлцэв. Шүүхээс Н.Батбаярыг үргэлжлүүлэн хорих шаардлагагүй гэж үзэн батлан даалтад гаргахаар шийдвэрлэлээ. Бондын санхүүжилттэй холбоотой уг хэргийн холбогдогчдыг ийнхүү гадуур шалгахаар болж байна.

Эх сурвалж: www.polit.mn