Б.ЭНХ

ОХУ дахь Монгол Улсын Элчин сайдын яамны байранд казино тоглож байсан хэрэг шуугиан тариад байна. Иог ажиллаж байгаа нэрээр мөрийтэй тоглоом тоглуулж байсныг Москва хотын цагдаа нар илрүүлжээ. Арбатын гудамжинд орших уг байрны хонгилын давхарт байрлаж байсан казино ойролцоогоор нэг сая ам.долларын үнэ хүрнэ гэж Оросын сайт мэдээлж байна. Цагдаа нарын шалгалтаар гол танхимд рулеттийн таван ширээ, 17 ширхэг автомат машин, хамгаалагч, кассчин зэрэг 10 гаруй ажилтантай байжээ. Мөрдөн байцаагчид тус газраас 20 сая рубль олжээ. Цагдаагийн газраас уг байр нь Монгол улсын Засгийн газрын байранд яагаад казино ажиллаж байгааг тодруулахаар эрүүгийн хэрэг үүсгэн шалгаж эхэлсэн байна.

ОХУ-ын бүртгэлийн газарт бүртгэгдснээр уг байр нь Монголын улсын Засгийн газрын өмч юм байна. Уг хэргийг ОХУ-ын хууль болон Дипломат харилцааны Венийн конвенцид заасны дагуу шалгах юм байна.

Тэгвэл энэ асуудлаар өнөөдөр Гадаад харилцааны яамны Төрийн нарийн бичгийн дарга Д.Даваасүрэн нарын хүмүүс тайлбар хийлээ. Казино ажиллуулж байсан гэх байрнаас Монголын Элчин сайдын яам нүүсэн байсан. Үүний дараа Москвагийн “Центр Регион Стиль” гэх компанид түрээсэлсэн гэв. Энэ тухай Төрийн нарийн бичгийн дарга Д.Даваасүрэн “Гадаад харилцааны сайдаас өгсөн үүргийн дагуу ОХУ-д суугаа Элчин сайд Б.Дэлгэрмаа өчигдөр /2017.03.06/ ЭСЯ-ны хоёрдугаар байрны түрээслэгчтэй холбогдоход тийм зүйл болоогүй, үйл ажиллагаагаа хэвийн явуулж байгаа гэсэн бол ЭСЯ-ны яамны ажилтнууд уг байрыг шалгахад цагдаа хууль, хяналтын байгууллагаас битүүмжилсэн зүйл үгүй, хаалга үүд нь хаалттай байсан байна” гэв.

Ямартаа ч Монгол Улсын өмчийн байранд хууль бус тоглоомын газар ажиллаж байсан нь үнэн болж таарлаа. ОХУ-ын цагдаагийн байгууллагын шалгалтаар энэхүү асуудал эцэслэн шийдэгдэнэ. Гагцхүү энэ асуудалд Гадаад харилцааны сайд Ц.Мөнх-Оргил ямар тайлбар өгөх нь сонин байна.

Эх сурвалж: www.polit.mn