Б.ЗАЯА

Хүүхдийн эрхийг хамгаалах чиглэлээр хурдан морины уралдааныг хүйтний улиралд зохион байгуулахыг Хүний эрхийн үндэсний комисс, хүүхдийн эрхийг хамгаалах байгууллага, иргэний нийгмийн байгууллагууд уриалсаар ирсэн. Засгийн газрын шийдвэрээр “Дүнжингарав-2017” тэргүүтэй хэд хэдэн уралдаан болох тов Сар шинийн баярын өмнө гарсан билээ. Тэгвэл энэхүү шийдвэрийн эсрэг иргэний нийгмийн байгууллагууд Захиргааны хэргийн анхан шатны шүүхэд хандсаны дагуу шүүх хурал өнгөрсөн долоо хоногт болж шийдвэрээ гаргасан юм. Шүүх бүрэлдэхүүн “...Засгийн газар 2017 оны хоёрдугаар сарын 22-нд Төв, Хөвсгөл, Говь-Алтай аймагт тус тус хаврын бүсийн уралдааны товыг баталж, Төвийн бүсийн хаврын уралдааныг Төв аймгийн Аргалант суманд гуравдугаар сарын 5, Хөвсгөл, Говь-Алтай аймагт гуравдугаар сарын 12-нд тус тус товлосон байх бөгөөд уг тогтоолын улмаас бага насны хүүхдийн эрүүл мэнд хууль ёсны ашиг сонирхол хөндөгдөж болзошгүй байх тул Захиргааны актын биелэлтийг түдгэлзүүлж шийдвэрлэх нь зүйтэй” гэжээ. Шүүхийн шийдвэрийг олон нийтийн сүлжээн дэх иргэд идэвхтэй дэмжиж байсан ч “Дүнжингарав-2017” уралдаан өчигдөр болсон юм. Шүүхийн шийдвэрийн тухайд Хууль зүй, дотоод хэргийн дэд сайд Б.Энхбаяр "Үндсэн хуульд зааснаар Засгийн газрын шийдвэрийг Засгийн газар өөрөө, эсвэл УИХ хүчингүй болгох эрхтэй. Захиргааны шүүх Засгийн газрын шийдвэрийг хянахгүй гэж Цэц шийдсэн" гэж олон нийтийн сүлжээгээр байр сууриа илэрхийлжээ. Гэвч энэхүү тайлбар нь 2016 оны долдугаар сарын 1-нээс өмнө хэрэгжиж байсан хуучин Захиргааны процессын хуульд өгсөн Үндсэн хуулийн цэцийн дүгнэлт гэдгийг хуулийн зарим хүмүүс тайлбарлаж байна. “Захиргааны хэрэг шүүхэд хянан шийдвэрлэх тухай хуулийн 13 дугаар зүйлийн
13.1-т "Захиргааны хэргийн шүүх Үндсэн хуулийн цэц болон өөр шүүхэд харьяалуулснаас бусад нийтийн эрх зүйн маргааныг хянан шийдвэрлэнэ" гэж заасан тул энэхүү маргаан нь Цэцэд харьяалсан маргаан бус, хуулийн дагуу Захиргааны хэргийн шүүхийн хянах маргаан” хэмээн албаны эх сурвалж хэлж байна.

Эх сурвалж: www.polit.mn