Б.ТУУЛ

Дэлхийд алдартай Бразилын багт наадам энэ сарын 24-28-нд болох гэж байна. Гэвч тус улсад нүүрлээд байгаа эдийн засгийн хямрал уламжлалт энэ баярыг өмнөх шигээ өргөнөөр тэмдэглэх боломжгүй болгож байна. Бразилын нийт 48 хот суурин энэ жил багт наадам зохион байгуулахгүйгээ зарласан байна. Тухайлбал, Сан Паоло мужийн Порт-Феррейра хотын захиргаа багт наадам зохион байгуулах мөнгөөрөө түргэний машинууд авахаа мэдэгдсэн байна.

Такуари хотын захирагч багт наадамд төсөвлөсөн мөнгөө тахир дутуу хүүхдүүдэд туслах төслийг санхүүжүүлж, эмч нарын аттестачлалыг түргэтгэхэд зарцуулахаа мэдэгджээ. Уламжлал ёсоор Рио-Де-Жанейро хотод хамгийн сүрлэг багт наадам болохоор байна. Гэхдээ энэ жил оролцогчид багт наадмын хувцас худалдан авах мөнгөө хэмнэж байгаагаа ярьцгааж байна. Өмнө нь багт наадамд оролцохын тулд хамгийн багадаа хоёр өөр хувцас авдаг байсан бол энэ жил нэг хувцастайгаа оролцохоо олонх нь илэрхийлж байна.
Бразил улсад багт наадмын хувцаснууд хийц, загвараасаа хамаараад 10-1000 ам.доллар байдаг байна. Тус улсын эдийн засаг сүүлийн жилүүдэд эрс муудсан. Өнгөрсөн оны дүнгээр л гэхэд эдийн засгийн уналт 4 хувьтай гарсан бол ажилгүйдлийн түвшин 12 хувийг давжээ. Энэ жилийн багт наадмыг нэг сая гаруй жуулчин ирж үзнэ гэж Риогийн аялал жуучлалын агентлаг тооцоолж байна. Тодруулбал, багт наадмын үеэр 950 орчим сая америк долларын орлогыг гадны жуулчид оруулна гэж тооцоолж байна.

Эх сурвалж: polit.mn