Т.САЙХАН

Авто тээврийн үндэсний төв, Замын цагдаагийн албаны удирдлагууд өнөөдөр /01.21/ онлайнаар орон нутаг дахь Авто тээврийн үндэсний төвийн нэгж, Замын цагдаагийн тасгийн ажилтнуудад сар шинийн баярын үеэр хэрхэн ажиллах чиглэл өглөө. Сар шинийн баярын өдрүүдэд хөдөө орон нутаг руу зорчих замын хөдөлгөөн эрс нэмэгддэг. Үүнээс болж осол аваар гарах нь ихэсдэг. Мөн орон нутгийг зорих иргэдийн эрэлтээс үүдэн зөвшөөрөлгүйгээр зорчигч тээвэрлэх, нийтийн тээврийн хэрэгсэл хулгайн замаар зорчиж осол аваар гаргах тохиолдол гардаг байна. Өмнөх жилийн сар шинийн баярын үеэр мотоциклийн ослоос үүдэн хоёр хүн амь насаа алдсан тул баярын үеэр мотоциклийн хөдөлгөөнийг хязгаарлах үүрэг өгөв. Цагаан сарын үеэр болдог морин уралдааны хамгаалалтад хэт анхаарснаас бусад газарт анхаарал сулардаг талтайг анхааруулан ажиллах хүчээ зөв хуваарилахыг санууллаа. Энэ үеэр Замын цагдаагийн албаны хэлтсийн дарга, хурандаа Ч.Жаргалсайхан “Сар шинийн баярын өдрүүдэд Улаанбаатар хот төдийгүй орон нутгийн замд түгжрал үүсдэг. Мөн хөдөө орон нутгийг чиглэх хөдөлгөөн нэмэгддэгтэй холбоотойгоор осол аваар нэмэгдэх хандлагатай байдаг. Тиймээс ард иргэд сар шинийн бэлтгэл, золголт шинэлгээ хийхээр замын хөдөлгөөнд оролцохдоо анхаарал болгоомжтой байх хэрэгтэй” гэв.

Эх сурвалж:www.polit.mn