Б.ЭНХ

Нийслэлийн Засаг даргын хэрэгжүүлэгч агентлаг Нийслэлийн Залуучуудын хөгжлийн газар болон Сэтгэцийн Эрүүл мэндийн үндэсний төв хамтран Нийслэлийн ерөнхий боловсролын сургуулиудын ахлах ангийн сурагчдын дунд согтууруулах ундаа, хорт зуршлаас урьдчилан сэргийлэх сургалтыг өнөөдрөөс Сүхбаатар дүүргийн 31 дүгээр сургуульд эхлүүллээ. Тус сургалтыг энэ онд нийслэлийн бүх дүүргүүдээр шат дараалалтайгаар зохион байгуулах юм.

Монголын сэтгэл судлалын хөгжлийн төвөөс 2016 онд Нийслэлийн ЕБС-ын зургаан сургуулийн ахлах ангийн 194 сурагчдыг хамруулан хорт зуршлын талаар  судалгаа хийжээ. Судалгааны үр дүнэлтээс  үзэхэд ахлах ангийн сурагчид хорт зуршлаас урьдчилан сэргийлэх талаар маш бага ойлголт, мэдлэгтэй байдаг ба  10 хүүхэд тутмын зургаа нь эрсдэлтэй нөхцөл байдалд байж болзошгүй гэж үзсэн байна. Мөн нийслэлийн Засаг дарга бөгөөд Улаанбаатар хотын захирагчийн 2016-2020 оны үйл ажиллагааны хөтөлбөрийн 4.6.2-т Залуучуудыг хотын соёлд суралцуулах, гэр бүлийн боловсрол олгох, сөрөг зан үйл хорт зуршлаас урьдчилан сэргийлэх, хамгаалах, соён гэгээрүүлэх, чөлөөт цагийн орчин нөхцөлийг сайжруулж, дэмжин ажиллахаар тусгагдсан байгаа.

Тиймээс өсвөр үе, залуучуудад хорт зуршлаас урьдчилан сэргийлэх талаар зөв мэдлэг, мэдээлэл олгох зайлшгүй шаардлагатай гэж үзэн Нийслэлийн Залуучуудын хөгжлийн газраас мэргэжлийн байгууллагуудтай хамтран тус сургалтыг нэг жилийн хугацаанд ЕБС-ын ахлах ангийн сурагчид болон оюутан залууст зориулан зохион байгуулах юм.

Эх сурвалж: www.polit.mn