Б.ТУУЛ

Хууль зүйн үндэсний хүрээлэн  нь  хууль эрх зүйн чиглэлээр докторыг зэрэг хамгаалсан эрдэмтдийг танилцуулан, тэдний эрдмийн зэрэг хамгаалсан бүтээлийг танилцуулах цуврал лекцийг зохион байгуулдаг билээ. Энэ удаагийн докторуудын цуврал лекцэд Монголын өмгөөлөгчдийн холбооны Удирдах зөвлөлийн гишүүн, хуульч өмгөөлөгч “Монгол Өмгөөлөгч” ХХН-ийн захирал, доктор З.Сүхбаатар оролцсон юм. Тэрээр “Хууль зүйн фирмийн менежментийг байгууллагын онолын хүрээнд судалсан нь” сэдвээр илтгэл тавьж, хуульч өмгөөлөгчдийн сонирхсон асуултад хариулсан юм. Энэхүү арга хэмжээнд Монголын Өмгөөлөгчдийн Холбоо, Монголын Хуульчдын Холбооны Өмгөөлөгчдийн хороо, Монголын Өмгөөлөгчдийн Холбооны гишүүн, хуульч өмгөөлөгчид,  Монголын Өмгөөлөгчдийн Холбооны салбар зөвлөлүүдийн төлөөлөл, шинэ залуу хуульчид, хууль эрх зүйн чиглэлээр судалгаа шинжилгээний ажил хийж байгаа мэргэжилтнүүд хүрэлцэн ирсэн байв. Доктор З.Сүхбаатар нь тавьсан илтгэлдээ  Монгол Улсын эдийн засгийн эрчимтэй өсөлтийн өгөөжийг иргэдэд хүртээмжтэй болгоход чиглэсэн хууль эрх зүйн орчинг хэрхэн бүрдүүлэх, эдийн засаг, бизнесийн орчны таатай өсөлтийг дэмжсэн хууль тогтоомжийг боловсруулахад , иргэдэд хүргэхэд юуг анхаарвал зохих талаарх олон улсын дэвшилтэт туршлагыг судалсан сонирхолтой жишээ, баримтуудыг дурьдсан нь хуульч өмгөөлөгчдөд санаа авах зүйл олон байв.  Мөн олон улсын эрх зүйн зохицуулалтад Монгол Улсын оролцоог өргөтгөх. эрх зүйн шинэтгэлийн орчин бүрдүүлэх, эдийн засгийн харилцааны эрх зүйн үндсийг боловсронгуй болгох чиглэлээр гаргасан олон судалгааны бүтээлүүдийг дэлгэсэн байв.  

Цуврал лекцийн зочин “Монгол Өмгөөлөгч” ХХК-ийн захирал, доктор З.Сүхбаатар нь  хууль эрх зүйн орчинд олон жил ажилласан чадварлаг хуульч, өмгөөлөгч. Тэр утгаараа энэ удаагийн лекцэнд ирсэн зочдоос түүний тавьсан “Хууль зүйн фирмийн менежментийг байгууллагын онолын хүрээнд судалсан нь” хэмээх  илтгэлийн дагуу болон хууль эрх зүйн хүрээнд хийгдэж буй шинэчлэлийн ажлууд, төрийн байгууллага, бусад байгууллага, иргэдэд холбогдох мэдээллээр үйлчлэх, хууль тогтоомжийг сонирхолтой, ойлгомжтой, хүртээмжтэй арга хэлбэрээр олон нийтэд сурталчлах зэрэг олон асуудлаар сонирхсон асуултаа асууж байсан юм. Ялангуяа төлбөрийн чадваргүй иргэдэд үнэ төлбөргүй эрхзүйн туслалцаа үзүүлэх тухай, өнөөдөр Монголын нийгэмд эрх зүйн шинэчлэлийг өргөн хүрээнд хийж, олон хууль тогтоомж баталж байна. Тэгвэл энэ бүх шинэчлэлд өмгөөлөгчид ямар үүрэг рольтой оролцох тухай зэрэг асуудлыг хуульч өмгөөлөгчид сонирхож байв.

Эх сурвалж: www.polit.mn