Д.БАЯР-ОТГОН

Нийслэлийн мэргэжлийн хяналтын газраас Цагаан сар болох гэж байгааг холбогдуулан зах болон томоохон худалдааны төвүүдэд хяналт шалгалт хийсэн. Энэ талаар Нийслэлийн мэргэжлийн хяналтын газрын хүнсний чанар, стандартын улсын ахлах байцаагч Т.Оюунбилигээс тодрууллаа.

-Цагаан сар болох гэж байгааг холбогдуулан хүнс, цагаан идээ болон бараа бүтээгдэхүүнд хяналт шалгалт хийсэн гэсэн. Ер нь ямар хүрээг хамаарсан шалгалт явагдаж байна вэ?

- Нийслэлийн мэргэжлийн хяналтын ерөнхий газрын даргын хянан шалгахаар баталсан урьдчилан сэргийлэх хянан шалгалт хийх тухай удирдамж гаргасан. Үүний дагуу нийслэлийн есөн дүүрэгт хүнсний худалдаа үйлчилгээ, үйлдвэр явуулдаг газруудын үйл ажиллагаанд хүнсний аюулгүй байдлыг хангуулах, нийтийг хамарсан хоол хүнсний хордлого гарахаас урьдчилан сэргийлэх, бараа бүтээгдэхүүний аюулгүй байдлыг хангах, ажил үйлчилгээний чанар зэрэгт стандартын шаардлагыг хангуулах, илэрсэн зөрчил дутагдалыг арилгах, үүсч болзошгүй байдлаас урьдчилан сэргийлэх зорилгоор нийт 88 улсын байцаагч Сар шинийг өнгөртөл хяналт шалгалт явуулна. Одоогийн байдлаар бараа бүтээгдэхүүн, хүнсний үйл ажиллагаа явуулдаг 68 аж ахуйн нэгж, 101 иргэн нийт 169 салбар төвүүд хамрагдаад байна.  

-Хяналт шалгалт хийх явцад ихэвчлэн ямар зөрчил илэрч байна вэ?

-Урьдчилан сэргийлэх хяналт шалгалт хийх явцад голчлон хаяг шошгын зөрчилтэй бүтээгдэхүүн, гарал үүсэл нь тодорхой биш бүтээгдэхүүнүүд илэрсэн. Иймд илэрсэн зөрчлийг Хүнсний аюулгүй байдлын тухай хуулийн дагуу зохих арга хэмжээг авч байна.

-Ихэвчлэн ямар бүтээгдэхүүн зөрчилтэй байна. Иргэд юун дээр анхаарах ёстой вэ?

-Нийтлэг илэрч байгаа зөрчил өндөг, кремтэй бүтээгдэхүүнийг стандартын темпертурт хадгалдаггүй. Зүгээр лангуун дээрээ тавьж зардаг зөрчлүүд илэрч байна. Мөн импортоор орж ирсэн бүтээгдэхүүнүүд гарал үүсэл тодорхойгүй, хаяг шошгын зөрчил их гарч байгаа юм. Жишээ нь, Солонгос, Хятадаас орж ирсэн бүтээгдэхүүн яг тэр улсынхаа хэл дээр бичсэнийг иргэд маань ойлгохгүй, төөрөгдүүлж байна. Яг стандарт шаардлагад нийцсэн англи, орос хэл дээр гарсан байх ёстой байдаг. Иймд иргэд маань бараа бүтээгдэхүүн худалдан авахдаа гарал үүсэл нь тодорхой хэсгийг шалгаж, хадгалалтын хугацаа, горимыг сайн хянаж авахыг анхааруулж байна.

Эх сурвалж: www.polit.mn