Т.ДАЛАЙ

Монголын үндэсний бөхийн холбоо наадмаас бусад барилдааны үеэр ч бөхчүүдээс сэргээшийн шинжилгээ авахаар болсон байна. Ингэхдээ хамгийн их санал авсан улсын цолтой найм, аймгийн цолтой найм, сумын цолтой найман бөхийг сэргээшийн шинжилгээнд хамруулах  гэнэ. Санал хураалтыг өчигдрөөс /02.07/ эхлэн нууцаар авч эхэлсэн бөгөөд одоогоор Архангай аймгийн "Бөх билигт" дэвжээ, "Алдар" спорт хороон дээр бэлтгэл хийж байгаа бөхчүүд, "Ховд" дэвжээ, "Хилчин" спорт хороо, Говь-Алтай, Увс, Өмнөговь, Хөвсгөл, "Их шавь" дэвжээ зэрэг нийт 300 гаруй бөхөөс санал аваад байна. Түүнчлэн бөхийн хорхойтнууд үзэгчдээс ч санал авах гэнэ.  Энэ сарын 12-нд болох Их Монгол Шаравжамц аваргын мэндэлсний 140 жилийн ойд зориулсан улс, аймгийн алдар цолтой 224 бөхийн барилдаанд үзэгчдээс саналаа өгөх боломжтой гэнэ.

Эх сурвалж:www.polit.mn