Б.ЭНХ

Хотын дарга Сар шинийн баяртай холбогдуулан автозамын ачааллыг зохицуулах захирамж гаргав. Автозамын хөдөлгөөнд ямар өөрчлөлт оруулсан талаар Замын цагдаагийн албаны Замын хөдөлгөөнийг зохицуулах хорооны дарга хурандаа Б.Батболдоос тодрууллаа.

-Хотын даргын захирамжаар автозамын хөдөлгөөнд ямар өөрчлөлт орж байгааг тодруулахгүй юу?

-Нийслэлийн Засаг даргын захирамжийн дагуу иргэдэд түргэн шуурхай аюулгүй зорчуулах зорилгоор Замын цагдаагийн албанаас дараах арга хэмжээ авч ажиллахаар болоод байна. Тодруулбал, амралтын өдөр буюу энэ сарын 11, 18-ны бямба гаригт автомашины улсын дугаарын сүүлчийн орон тэгш тоогоор төгссөн, 12, 19-ний ням гаригт автомашины улсын дугаарын сүүлчийн орон сондгой тоогоор төгссөн тээврийн хэрэгслүүд замын хөдөлгөөнд оролцоно.

-Сар шинийн эхний өдрүүдэд дугаарын хязгаарлалт үйлчлэхгүй гэсэн үү?

-Шинийн 1, 2, 3-ны өдрүүдэд зорчигчид дугаарын хязгаарлалтгүйгээр хөдөлгөөнд оролцоно. Дугаарын хязгаарлалтын хувьд өвлийн цагийн хуваарийн хамрах хүрээн дээр Саппорогийн уулзвараас, Таван шарын уулзварыг оруулсан. Үүнтэй холбоотойгоор орон нутгаас зорчин ирж байгаа тээврийн хэрэгслийн жолооч нар тухайн цаг үеийн бүсчлэлийг анзаарч, цагаа тохируулан замын хөдөлгөөнд оролцохыг зөвлөж байна.

Эх сурвалж: www.polit.mn