Х.ЦОМ

БНХАУ-ын иргэд визгүй зорчих мэдээлэл олны шүүмжлэлд өртөөд байна. Энэ талаар Гадаад харилцааны сайд Ц.Мөнх-Оргилоос тодруулахад  “БНХАУ-ын 10-20 хүн нэг доор орж ирэх болбол тэдний материалыг урьдчилж аваад, виз олгодог болох асуудлыг яриад байгаа юм. Өөрөөр хэлбэл хөнгөлнө гэсэн үг. Аялал жуулчлалыг хөгжүүлэхэд визний асуудлыг яаж хөнгөвчилж болох талаар судал гэдэг даалгаврын Засгийн газраас өгсөн. Энэ судалгааг Гадаад харилцааны яам, Байгаль орчин ногоон хөгжил, аялал жуулчлалын яам хийж байгаа. Монгол Улс 42 улстай визгүй зорчиж  байгаа. Харин визтэй орж ирж байгаа иргэдийн хувьд бүлэг жуулчлал, бүлэг виз, цахим виз олгодог болох тухай судалж байна. Мөн зарим орны иргэдэд Замын-Үүдийн хилийн боомт юм уу Буян-Ухаа олон улсын онгоцны буудал дээр виз олгох тухай асуудлыг судална. Түүнээс биш бүх орны иргэд тур дундаа Хятад улсын иргэд визгүй Монгол Улсад нэвтэрнэ гэсэн асуудал байхгүй” гэсэн тайлбарыг өглөө.

Эх сурвалж: www.polit.mn