С.САРУУЛ

МАН-ын бүлгийн дарга Д.Хаянхярваа, бүлгийн ажлын албаны дарга Н.Энхтайван нар их жанжин Д.Сүхбаатар, маршал Х.Чойбалсан нарын төрөл төрөгсдийг хүлээн авч, хүндэтгэл үзүүллээ. Тодруулбал, их жанжин Д.Сүхбаатарын мэндэлсний 124, маршал Х.Чойбалсангийн мэндэлсний 122 жилийн ойн хүрээнд тэдний төрөл төрөгсдөд талархал илэрхийлсэн юм. МАН-ын бүлгийн дарга Д.Хаянхярваа “Монголын түүхэнд тодоор бичигдэн үлдсэн олон агуу хүн бий. Монгол Улсын тусгаар тогтнолыг авч үлдсэн хүмүүс бол та нарын өвөг дээдэс болох энэ эрхэм хүмүүс юм. МАН энэ хоёр эрхэм хүнийхээ үүх түүх, гавьяа зүтгэлийг залуу хойч үеийнхэнд мөнхлөн үлдээхийн тулд тодорхой олон ажлыг зохион байгуулж байна. Ямар ч үед түүх үнэнээрээ үлдэх ёстой” хэмээн онцолсон юм. 
 Уулзалтын үеэр Д.Сүхбаатар жанжны зээнцэр Ц.Хүрэлсүх “Өнөөдөр манай өвөөгийн 124 жилийн ой тохиож байна. Их жанжин Д.Сүхбаатар бол Монголын суут хүү, цэргийн гарамгай жанжин, Монгол Улсын тусгаар тогтнол, эх орныхоо төлөө амь насаа хайргүй зориулсан хүн. Гадаадын түрэмгийлэгчдийг эх орноосоо зайлуулах, Манжийн дарлалаас эх орноо чөлөөлж тусгаар тогтноход гавьяа байгуулсан залуу жанжин, суут хүн байсан. Д.Сүхбаатар, Х.Чойбалсан нарын ахан дүүсийг хүлээн авч, хүндэтгэл үзүүлж байгаад талархалтай байна" гэв. Түүний хэлснээр Сүхбаатар, Төв аймгийн зарим суманд жанжны төрөл төрөгсөд болох 300 гаруй хүн амьдардаг аж. 
Мөн маршал Х.Чойбалсангийн зээ Ч.Халиун “Бидний эрх чөлөө, тусгаар тогтнолыг цогцлоосон энэ хоёр хүн хоёрдугаар сард мэндэлсэн байдаг. Жанжин Д.Сүхбаатар хоёрдугаар сарын 2, манай өвөө хоёрдугаар сарын 8-нд мэндэлсэн. “Ирээдүйгээ мэдье гэвэл өнгөрснөө сайн судал” гэсэн үг байдаг. Иймд эдгээр түүхэн хүмүүсээ дурсч, үр хүүхдийг нь хүлээн авч уулзаж байгаад бид баяртай байна" гэлээ.

Эх сурвалж: www.polit.mn