Т.ДАЛАЙ

Засгийн газрын 2016-2020 оны үйл ажиллагааны хөтөлбөрт "Ач санах хуулийг батлуулж, азай буурлууддаа насны хишиг олгох эрх зүйн орчин бүрдүүлнэ" гэж тусгасан. Энэ зорилтын хүрээнд Хөдөлмөр, нийгмийн хамгааллын яамнаас Ахмад настны тухай хуулийн шинэчилсэн найруулгын төслийг боловсруулж УИХ-аар өчигдөр батлууллаа.  Хууль батлагдсанаар:65-69 настанд 50.000, 70-79 настанд 80.000, 80-89 настанд 150.000, 90 түүнээс дээш настанд 250.000 төгрөгийг цагаан сар, улсын наадмаар буюу жилд хоёр удаа насны хишиг болгож олгохоор болов. Ахмадууд маань энэхүү насны хишгийг авах бол  өнөөдөр буюу хоёрдугаар сарын 1-ний өдрөөс эхлэн оршин суугаа сум, хорооныхоо нийгмийн ажилтанд хандана. Итгэмжлэгдсэн төлөөлөгчөөрөө дамжуулж болно. Иргэний үнэмлэх нотолгоо болох юм. Насны хишиг авах өргөдлийн маягтыг бөглөж, банкаар дамжуулан авна. Тухайн банк насны хишгийг өндөр насны тэтгэврийн зээл болон бусад зээл, зээлийн хүүнд суутган авах хориотой байна.

Эх сурвалж:www.polit.mn