Б.ТУУЛ

БСШУС-ын сайд Ж.Батсуурь шинжлэх ухааны салбарын санхүүжилтийг тав дахин нэмнэ хэмээн УДБЭТ-т өнөөдөр болсон шинжлэх ухааны салбарын ажилтан, албан хаагчтай уулзах үеэр онцлов.Уулзалтын эхэнд тэрээр шинжлэх ухааны салбарын өнөөгийн байдал, баримталж буй бодлого, хийхээр төлөвлөсөн ажлын талаар танилцуулсан юм. Мөн тэрээр хэлэхдээ, “Тухайн улс орны шинжлэх ухааны санхүүжилт нь ДНБ-ий нэг хувьд хүрэхэд улсын эдийн засагт мэдэгдэхүйц үр ашгаа өгдөг гэж үздэг. Харин манай улсын шинжлэх ухааны санхүүжилт 0.16 хувь байгаа нь маш доогуур үзүүлэлт юм. Иймээс ойрын үед шинжлэх ухааны санхүүжилтийг тав дахин нэмнэ. Мөн судалгааны үр дүнг үйлдвэрлэл, үйлчилгээнд нэвтрүүлэх, хууль эрхзүйн орчныг боловсронгуй болгох, технологи дамжуулах төв байгуулах, БНХАУ-тай хамтарсан шинжлэх ухааны парк байгуулах ажлыг эрчимжүүлэх зэрэг ажил хийхээр төлөвлөөд байна” гэв.Одоогийн байдлаар тус салбарт Шинжлэх ухаан технологийн үндэсний зөвлөл, Шинжлэх ухааны академи, яамдын шинжлэх ухаан технологийн зөвлөл, их сургуулиуд, хүрээлэнгүүд, хувийн хэвшлийн эрдэм шинжилгээний байгууллагууд багтаж байна. Эдгээрт нийт 1720 эрдэм шинжилгээний ажилтан ажиллаж байгаа юм. Манай улсын хувьд одоогоор ОХУ-тай 30, БНХАУ-тай 6, Солонгос улстай 2, Беларус улстай 2, Вьетнам улстай 2, Тайваньтай шинжлэх ухаан, технологийн хамтарсан төсөл хэрэгжүүлэх замаар идэвхтэй хамтран ажиллаж байна. Сүүлийн жилүүдэд их сургуулиудын лабораторийн орчныг сайжруулахад улсын төсвийн болон Азийн хөгжлийн банкны хөнгөлөлттэй зээлийн хөрөнгөөр 20 гаруй тэрбум төгрөгийн хөрөнгө оруулалт хийгджээ. Харин эрдэм шинжилгээний хүрээлэнгүүдэд сүүлийн 30 орчим жил хөрөнгө оруулалт бага хийгдсэнийг уулзалтын үеэр салбарын сайдад уламжиллаа. Түүнчлэн салбарын ажилтан, албан хаагчид, эрдэмтэн, судлаачдын цалин, урамшуулал, нийгмийн баталгаа, хүний нөөцийн бодлого зэрэгт анхаарлаа хандуулж ажиллах шаардлагатай байгааг сануулав. Уулзалтын төгсгөлд БСШУС-ын сайд Ж.Батсуурь судалгааны үр дүнг үйлдвэрлэл, үйлчилгээнд нэвтрүүлэх, хууль эрхзүйн орчныг боловсронгуй болгох, технологи дамжуулах төв байгуулах, БХНАУ-тай хамтарсан шинжлэх ухааны парк байгуулах ажлыг эрчимжүүлэх зэрэг олон ажил хийхээр төлөвлөж байгаагаа дуулгав.

Эх сурвалж: www.polit.mn