Б.ТУУЛ

НИТХ-ын төлөөлөгч Д.Мөнхжаргал нийслэлийн 216 цэцэрлэгийн анги бүрт нэг ангийг тохижуулж өгөхөөр болжээ. Энэхүү ажлынхаа эхлэл болгож, ХУД-ын 209 дүгээр цэцэрлэгт хүүхдийн сэтгэхүй хөгжүүлэх тоглоом, ном бэлэглэсэн юм. Мөн хүүхдээ багаас нь хөгжүүлэх нь ямар чухал болох талаар НИТХ-ын төлөөлөгч, Нийгмийн хөгжлийн хорооны дарга Д.Мөнхжаргал ХУД-ын 209-р цэцэрлэгийн эцэг эхчүүдэд лекц уншсан юм. Тэрээр Ерөнхий боловсролын сургууль, их, дээд сургуулийн чанар, үр дүнг сургуулийн өмнөх боловсролтой шууд хамааралтай гэж үзэж байгаа учраас цэцэрлэгүүдийн сургалтын материаллаг бааз, хүүхдүүдийн нас сэтгэхүйд тохирсон тоглоом, багш нарын гарын авлага, хэрэглэгдэхүүн, үзүүлэн таниулах материалд хангалттай төсвийг хуваарилаж, эцэг эхчүүдийг нь энэ ажилд сайн дураар идэвхийлэн оролцохыг уриалж байгаа юм. Сүүлийн 20 гаруй жил сургуулийн өмнөх боловсрол, түүний ач холбогдлын талаар өргөн хэмжээний судалгаа хийгдэж, Дэлхийн олон улс гүрнүүд сургуулийн өмнөх боловсролын ач холбогдлыг дуу нэгтэйгээр хүлээн зөвшөөрч, СӨБ-д хамгийн их хөрөнгө оруулалтыг оруулдаг болсон. Тиймээс энэ ажлыг НИТХ-ын төлөөлөгч Д.Мөнхжаргал санаачлан хийж байгаа аж.

Эх сурвалж: www.polit.mn