Б.ЗАЯА

Нийслэлийн иргэдийн төлөөлөгчдийн хурлын дарга Ц.Сандуй дүүргүүдийн ИТХ-ын дарга нартай хамтран ажиллах санамж бичгийг өнөөдөр байгууллаа. Хотын захиргаанд Нутгийн удирдлагын холбоо гэж бий. Тус холбоог НИТХ-ын дарга тэргүүлдэг. Энэ удаагийн санамж бичиг тус холбооны үйл ажиллагааны чиглэлээр зурагдсан юм. Тодруулбал, Нутгийн удирдлагын холбоо дүүргүүдийн ИТХ буюу холбооны салбар зөвлөлийн дарга нараар дамжуулан иргэдийг төлөөлөгч буй төлөөлөгчдийг чадавхжуулах зорилготой.

Санамж бичгийг Хан-Уул, Чингэлтэй, Сүхбаатар, Сонгинохайрхан, Багахангай дүүргийн ИТХ-ын дарга нартай байгуулсан юм. Энэ тухай НИТХ-ын дарга Ц.Сандуй “Санамж бичиг байгуулснаар нутгийн өөрийн удирдлагын байгууллага шат шатандаа ажиллаж иргэдийн оролцоог идэвхжүүлж, өндөржүүлэх талаас ойлголцох юм. Үүний биелэлтэд иргэд, сонгогчид дүн тавьж ажиллаж ёстой. Гарын үсэг зурсан салбар зөвлөлийн дарга нартаа амжилт хүсье. Түүнээс гадна Зөвлөлдөх зөвлөлийг шинэчлэн байгууллаа. Зөвлөлдөх зөвлөлийнхан нийслэл хот хөгжих эрхзүйн шинэтгэлийн ажилд ханжцуй шамлан орж байна. Өөрөөр хэлбэл, Монгол Улсын хөгжлийн олон гарцын нэг нь хотын хөгжил. Үүнд манай зөвлөлдөх зөвлөл эрхзүйн талаас нь зөвлөгөө өгнө. Мөн шинээр сонгогдсон нийслэл, дүүргүүдийн Иргэдийн хурлын төлөөлөгчдийн чадавхийг дээшлүүлэхээр сургалт, зөвлөгөө өгч ажиллана. Иргэдийн оролцоог төрийн түвшинд, төлөөллийн байгууллагын түвшинд гаргаж ирэх тодорхой ажлуудыг хийхээр зөвлөлдөж төлөвлөгөө батлуулсан” гэлээ.

Б.Цэрэн: Төлөөлөгч нарын мэдлэг чадварыг дээшлүүлнэ

/Хан-Уул дүүргийн ИТХ-ын дарга/

-Санамж бичгийн хүрээнд сонгогдсон төлөөлөгч нарын мэдлэг чадварыг дээшлүүлэх, хамгийн гол нь гаргасан шийдвэрүүд нь иргэддээ ойртсон зөв зүйтэй, нутгийн онцлогт тохирсон сургалтууд, чадавхжуулах үйл ажиллагаа руу чиглэж ажиллана. Төлөөлөгч гээд ямар ч хүн сонгогдоод ирж байгаа. Тэр хүнийг хурлын мэргэшсэн төлөөлөгч болтол нь чадавхжуулах зорилголтой. Үүний төлөө хамтран ажиллах болно. Хан-Уул дүүргийн ИТХ саяхан бүтэц зохион байгуулалтаа баталсан. Засаг захиргаа, нутаг дэвсгэрийн нэгж, түүний удирдлагын тухай хуульд дүүргийн Иргэдийн хуралд үндсэн гурван үүрэг харъяалуулсан байдаг. Нэгдүгээрт, холбогдох хуралдааныг зохион байгуулах, хоёрт, батлагдсан хуулиудыг сурталчлах эрх бий. Мөн хууль тогтоомжийн хэрэгжилтэд хяналт хийх эрхтэй. Тиймээс энэ чиглэлд бүтэц зохион байгуулалтыг хийж тодорхой ажлуудыг эхлүүлээд байна.

Д.Бат-Эрдэнэ: Хуулийн хэрэгжилтэд хяналт тавьж байна

/Чингэлтэй дүүргийн ИТХ-ын дарга/

-Дүүргийн ИТХ, нутгийн өөрөө удирдах ёсны байгууллага бол нутаг дэвсгэр дээрээ хууль хэрэгжүүлж байгаа байдалд хяналт тавих, зохион байгуулах үүрэгтэй. Ерөнхийдөө Засгийн газар, УИХ-аас орон нутгийн чанартай гарч байгаа тогтоол шийдвэрийг биелүүлэх, хяналт тавьж ажиллаж байна. Чингэлтэй дүүргийн хувьд гарч байгаа тогтоол шийдвэр бүрт бид мониторинг хийж энэ чиглэлээр ажил зохион байгуулж, шаардлагатай бол тэргүүлэгчдээр оруулж зөвлөмж шийдвэр гаргуулж байгаа.

Эх сурвалж: www.polit.mn