Б.ЗАЯА

Сүхбаатар дүүргийн хоёрдугаар хороонд байрлах “Сант” бүрэн дунд сургуулийн өргөтгөлийн барилгын ажил маргаан дагуулаад багагүй хугацаа өнгөрч байна. “Сант” бүрэн дунд сургуулийг өргөтгөж барих ажлын санхүүжилт 2.3 тэрбум төгрөг байжээ. Одоогоос дөрвөн жилийн өмнө буюу 2013 оны зургадугаар сараас өргөтгөлийн барилгын ажлыг гүйцэтгэж эхэлсэн гэх “Бүрэн цутгамал” компанийнхан захиалагч болон Нийслэлийн хот төлөвлөлт, ерөнхий төлөвлөгөөний газрынхан хууль зөрчсөн хэмээн өнөөдөр олон нийтэд хандлаа.

Тус компани 2013 оны зургадугаар сард Сант сургуультай гэрээ байгуулж ажлаа эхлүүлснийг компанийн захирал Б.Батдэлгэр хэлэв. Маргаан барилгын ажил эхэлснээс нэг сарын дараагаас эхэлсэн гэж байна. Захиалагч “Сант” сургуулийн зүгээс дотор сантехник, салхивч зэргийг өөр компаниар гүйцэтгүүлэхээр оруулж иржээ. Бас өөр нэгэн компани сургуулийн захиалгаар өргөтгөлийн заслын ажлыг хийж “Бүрэн цутгамал” компанийн ажилтай булаацалдаж эхэлсэн гэж байна. Энэ тухай “Бүрэн цутгамал” компанийн захирал Б.Батдэлгэр “Анхнаасаа гүйцэтгэгчээр манай компани гэрээ хийчихээд ажиллаж байхад өөр компани орж ирж бидний ажлыг булааж хөөх болсон. Үүгээр зогсохгүй “Сант” сургуулийнхан санхүүжилтээ олгоогүй. Манайх зургадугаар сард ажлаа эхлүүлж аравдугаар сар хүртэл үргэлжлүүлсэн. Энэ хугацаанд өргөтгөлийн барилгын ажлын 85 хувийг гүйцэтгэсэн. Энэ ажилд манайх 1.6 тэрбум төгрөг зарцуулсан. Гэтэл шүүх цагдаагаар явсны эцэст сургуулийн зүгээс 1.1 тэрбум төгрөг л өгөөд байгаа. Өнгөрсөн хугацаанд үүссэн асуудлуудын хамгийн гол нь нэгэнт нэг компанитай гэрээ байгуулчихаад өөр компаниуд оруулж ирсэн нь хууль зөрчсөн явдал. Түүгээр зогсохгүй “Сант” сургуулийнхан манай барилгын ажлыг чанарын шаардлага хангаагүй гээд цагдаа, шүүхэд гомдол гаргасан. Бүр хохирол нэхээд байгаа. Тэгсэн хэрнээ Улсын комисст өнгөрсөн онд мэдэгдэл хүргүүлж “Манай сургуулийн барилга чанарын шаардлага хангасан. Хүлээж авна уу. Барилгаа байнгын ашиглалтад оруулъя” гэсэн байгаа юм” гэлээ.

Б.Батдэлгэр: Нэг ч тоосго өрөөгүй компани гүйцэтгэгч болоод гараад ирсэн

Түүний ярьснаар “Сант” сургуулийн барилгын ажлыг гүйцэтгэгчээр дахиад өөр компани гарч ирсэн байна. Тодруулбал, ерөнхий гүйцэтгэгч “Голомт” констракшн. Улсын комиссын актад ч тус компанийнхан ажил гүйцэтгэсэн мэтээр акт үйлдэгдэж, “Бүрэн цутгамал” компанийн нэр ч дурдагдаагүй хэмээн тус компанийнхан бухимдан ярьж байна. Энэ тухай компанийн захирал Б.Батдэлгэр “Нэг ч тоосго өрөөгүй, шавар зуураагүй компани гэнэт ерөнхий гүйцэтгэгч болоод гараад ирсэнд гайхаж байна. Улсын комисс ажиллахдаа энэ асуудлыг анхааралгүй орхисонд эргэлзэж байгаа. Нийслэлийн хот төлөвлөлт, ерөнхий төлөвлөгөөний газрын Хот байгуулалт, дэд бүтцийн хяналтын албаны дарга Т.Эрдэнэтуяа нарын хүмүүс Улсын комисст орж ажилласан. Гэнэт гарч ирсэн “Голомт” констракшн компанийнхныг ч гайхаж байна. Тэд адилхан нэг салбарт ажиллаж байж нэгнийхээ ажлыг булааж болдог юм уу. Энэ бол барилгын салбарын түүхэнд болж байгаагүй үйл явдал. Тиймээс хууль, хяналтын хүмүүс энэ ээдрээтэй асуудлыг цэгцэлж, “Голомт” констракшнны захирлаас тайлбар авахыг хүсч байна” гэлээ.

Д.Зургаанжин: Шүүхэд нөлөөлөх гэсэн оролдлого

Энэ талаар “Сант” сургуулийн захирал Д.Зургаанжингаас тодруулахад “Энэ асуудал дөрвөн жил сунжирч байгаа юм. Одоо шүүхийн шатанд яваа. Иргэний болон эрүүгийн хэргийн шүүхэд ажиллагаа үргэлжилж байна. “Бүрэн цутгамал” компанийн энэхүү ажиллагаа нь шүүх ажиллагаанд нөлөөлөх гэсэн оролдлого. Тэдний буруу зөрүү, дутуу хийсэн ажлаас болж 1300 хүүхэд хохирч байна. Энэ бол нийгмийг хамарсан асуудал биш. Хоёр байгууллагын хоорондын асуудал. Хоорондоо ойлголцож чадахгүй бол шүүх л шийдээд өгчихнө” гэв.

Эх сурвалж: www.polit.mn