Б.ДАМДИН

Тавантолгойн орд. Үнэн хэрэгтээ энэ орд улстөрчдийн, засгийн эрх барьсан улс төрийн намуудын “тоглоом”  болоод арав гаруй жил боллоо. Ашигладаг ч үгүй, хөдөлгөдөг ч үгүй, хулганаар наадах муур адил бөмбөчүүлж бөмбөчүүлж сонгуульд ялагдаад яваад өгнө. Хамгийн гол нь энэ хооронд нийтийн эрх ашигт нийцсэн гэрээний төсөл эрх баригчдын зүгээс гарч байсангүй.

Гэхдээ Тавантолгойн ордын “хөдлөх” цаг одоо болсон бололтой. МАН-ын Засгийн газар  “Эрдэнэс Тавантолгой” компанийн 49 хувийг Хятадын Шинхуад, 51 хувийг Монголын Энержи Ресурст өгч ашиглуулах төслийг ирэх сарын 6-наас УИХ-аар хэлэлцүүлэхээр зэхэж байгаа мэдээлэл бий.

Тэгвэл үүнээс өмнө амжиж Ерөнхийлөгч Ц.Элбэгдорж Тавантолгойн ордын талаар акц хийж магадгүй байна. Тодруулбал, Ерөнхийлөгч Давосын чуулганд явахаасаа өмнө зөвлөхүүдээ дуудаж хуралджээ. Ингэхдээ Тавантолгойн ордыг ашиглуулахаар хийх гэж буй МАН-ын гэрээний төслийн эсрэг, ард түмэнд эзэмшүүлэх хувийг нэмэгдүүлэх ямар араг зам байгааг судлах үүргийг зөвлөхүүдээ өгч, нөгөөдүүл нь ажлын хэсэг байгуулан ажиллад эхэлсэн гэнэ.

Тэгэхээр Тавантолгойн ордыг ашиглуулах гэрээний олон нийтэд ашигтай төсөл гарч ирж магадгүй юм гэдгийг эх сурвалж хэлж байна.

Эх сурвалж: polit.mn