Ч.ДАВААНЯМ

Оюутны хөгжлийн зээлийг урт болон удаан хугацаатай олгохоор болсон. Зээлийн олголтын талаар БСШУСЯ-ны Боловсролын зээлийн сангийн Зээлийн мэргэжилтэн Б.Зоригоогоос тодрууллаа.

-Оюутны сургалтын төлбөрийн зээлийг хэдэн банкаар, хэчнээн сургуулийн оюутанд олгож байна вэ?

-Засгийн газрын 2016 оны аравдугаар  сарын 5-ны өдрийн 111 тогтоолоор “Оюутны хөгжлийн зээл”-ийн журмыг баталсан. Энэ журмын дагуу БСШУСЯ-ны Боловсролын зээлийн сан , магадлан итгэмжлэгдсэн 75 их, дээд сургууль, коллеж, зургаан банктай гурвалсан гэрээг байгуулснаар зээлийг олгож эхэлсэн.

-Ямар банкаар олгож байгаа вэ?

- ХААН, Хас, Голомт, Төрийн банк, Капитал, Улаанбаатар банк олгож байгаа. Эдгээр  банк “Оюутны хөгжлийн зээл” олгох өөрсдийн дотоод  журмыг боловсруулж, тодорхой шалгуур  тавьсан байгаа. Тиймээс тэндээс мэдээлэл авах нь зүйтэй. Тухайн шалгуурыг хангасан оюутан зээл авах боломж нь нээлттэй.

-Банкинд хүсэлт гаргасан ч зээл нь гарахгүй, буцаагдаад байна гэх юм. Энэ юутай холбоотой юм бол?

-Банк нэг хоногийн хугацаанд зээлийг олгох эсэхээ шийдэж хариугаа өгч байгаа. Яагаад удаад байна гэвэл  зээл хүсэгчийн материал дутуу, аль банкинд хандахаа судлаагүйгээс хугацаа алддаг.  Мөн үндсэн зээлдэгч нь оюутан боловч хамтран зээлдэгч нь эцэг эх нь байдаг. Тиймээс эцэг эх нь өөрсдийн харилцдаг банкиндаа зээл авах хүсэлт  гаргавал давуу талтай .

-Оюутны хөгжлийн зээлд хэчнээн оюутан хамрагдсан вэ?

-Одоогоор тодорхой тоо гараагүй байна. Ирэх  сард гарна.

Эх сурвалж: www.polit.mn