Ч.ДАВААНЯМ

Нийслэлийн хэмжээнд ЕБС-ийн сурагчдын амралтыг сунгах шийдвэрийг БСШУСЯ-наас гаргасан. Харин цэцэрлэгийн үйл ажиллагааг яаж зохицуулах талаар Нийслэлийн боловсролын газрын Орлогч дарга Ц. Отгончимэгээс тодрууллаа.

-Сурагчдын амралтыг энэ сарын 30-ныг хүртэл сунгасан. Цэцэрлэгийн хүүхдүүдийг түр хугацаа­гаар амраах уу. Эцэг, эхчүүд энэ талаар асууж өгөөч гээд байна?

-БСШУСЯ-наас цэцэрлэгийн хүүхэдтэй холбоотой сайдын тушаал гараагүй.  Өнөөдрийн байдлаар сургуулийн өмнөх боловсролын  байгууллага хэвийн үйл ажиллагаагаа явуулж байна.

-Цэцэрлэгийн хүүхдүүд агаарын бохирдол, ханиад томуугийн өвчлөлд хамгийн их өртдөг. Гэтэл өвчтэй, ханиадтай гээд цэцэрлэгтээ яваагүй хүүхдийг хасна гээд байна гэх юм. Үүнийг яаж зохицуулж байгаа вэ?

-Сургуулийн өмнөх боловсролыг хүүхэд бүр хүртэх эрхтэй.  Хүүхэд удаан хугацаагаар өвчлөөд эдгэснийхээ дараа цэцэрлэгтээ буцаж орох эрх нь нээлттэй. Багш нар ч гэсэн сургалт хүмүүжлийн  үйл ажиллагаандаа хүлээн авч үйлчилгээ үзүүлэх үүрэгтэй.

-Нийслэлийн хэмжээнд цэцэрлэгүүдэд ханиад томуугийн өвчлөл хэр байна?

-Сүүлийн хоёр долоо хоногт  ханиадны тархалт буурсан ч 8.6 хувьтай байгааг мэдээлсэн. Гэхдээ цэцэрлэгийн орчин дулаан, эрүүлжүүлэх шим тэжээлтэй хоол ундаар  үйлчилж байгаа учраас өвчлөлийн хувь багасч байна.