Т.САЙХАН

АШУҮИС-иас захирлыг нь улс төрийн шалтгаанаар ажлаа өгөхийг шаардсан талаар мэдэгдэл гаргажээ.  Тэд 2013 оноос хойш тус сургуулийг удирдсан захирал профессор Г.Батбаатар нь ажлаа сайн хийж, энэ салбарыг үсрэнгүй хөгжихөд тодорхой хувь нэмэр оруулсан гэж үзэж байгаа юм.  Энэ талаарх саналаа Төрийн гурван өндөрлөг болон холбогдох байгууллагад учирлан тайлбарласан бичгийг удаа дараа хүргүүлсэн байна.   Мэдэгдэлд “Албан тушаал горилогч, эх орноо гэсэн сэтгэлгүй нөхдүүд, тухайлбал БСШУС-ын сайдын зөвлөх Ж.Цолмон мэтийн сургалт эрдмийн ажлын туршлагагүй, урд хашиж байсан ажил үүргээ амжилттай биелүүлж чадаагүй, ашиг сонирхлын зөрчилтэй нөхдүүдийг манай хамт олон эрс эсэргүүцэж байна” гэжээ.  Мөн “Монголын ард түмэн Монгол ардын намыг сонгосон. Бид ч бас сонгосон. БСШУС-ын сайд ноён Ж.Батсуурь Монгол ардын намын Удирдах Зөвлөлийн нэрийг барин улс төрийн бохир шийдвэр гаргахаар улайран зүтгэж байна.  Даргын цүнх барьж албан тушаал горилогчдод манай их сургуулийн үүд хаалга хаалттай, сургалт эрдэм шинжилгээний академик байгууллагад гишгэх газар байхгүй болно. Их сургуулиа улс төрийн бохир савраас аварцгаая залуусаа. Эрүүл монгол хүн байж эх орон маань хөгжих учиртай.
Их сургуулийг сэтгэлтэй, эрдэмтэй хүмүүс удирдах учиртай. Эх орон, ард түмнийхээ эрүүл мэндийн төлөө гэсэн сэтгэлтэй бүхэн энэ мэдэгдлийг цааш нь түгээж бидэнтэй нэгдээрэй” гэжээ.

Эх сурвалж:www.polit.mn