Ц.БАЯР

Улсын Их Хурлын гишүүн, Өргөдлийн байнгын хорооны дарга Д.Сарангэрэл, УИХ гишүүн Б.Энх-Амгалан нар “Түрээсийн орон сууц хөтөлбөр”-ийн хэрэгжилтийн явцтай танилцаж  “Төрийн орон сууцны корпораци” -т ажиллалаа. ЭНЭ  үеэр Өргөдлийн байнгын хорооны дарга Д.Сарангэрэл иргэдээс ирүүлж буй өргөдлийн дийлэнх хувь нь байгаль орчны бохирдол ахуйн амьдралтай холбоотой асуудал байдаг. Иргэдэд хүлээлт үүсгээд байсан түрээсийн орон сууцны хөтөлбөр зогссон. Иргэд энэ хөтөлбөрийг цаашид үргэлжлэх эсэх талаар мянга орчим өргөдөл ирүүллээ. Тиймээс Барилга, хот байгуулалтын яам болон Төрийн орон сууцны корпорациас салбарынхаа  хийж байгаа ажил  хэрэгжүүлж буй бодлогоо танилцуулахыг хүслээ.

“Түрээсийн орон сууц” хөтөлбөрийн талаар ТӨҮГ-ын Ерөнхий захирал Ж.Хичээнгүй хэлэхдээ: “Түрээсийн орон сууц” хөтөлбөрийг эхлүүлэх Засгийн газрын шийдвэр 2016 оны 2 дугаар сард гарсан. Энэ хөтөлбөрт орон сууц шууд худалдан авах боломжгүй, орон сууцны ипотекийн найман хувийн зээлийн нөхцлийг хангаж чадахгүй байгаа буюу орон сууцны урьдчилгаа төлбөр болох 30 хувь нь бүрдээгүй, бага, дунд орлоготой иргэд хамрагдахаар тусгасан байна. Үүнд, залуу гэр бүл, ахмад настнууд,  хувийн хэвшлийнхэн, төрийн албан хаагчид, гэр оронгүй иргэд, дөрөв ба түүнээс дээш хүүхэдтэй өрх толгойлсон эмэгтэй, эрэгтэй болон хөгжлийн бэрхшээлтэй иргэд хамрагдана  гэж заасан.

Төрийн өмчийн түрээсийн орон сууцны нэг сарын төлбөр нь өрхийн сарын дундаж орлогын 25 хувиас хэтрэхгүй байхаар зааж, Улаанбаатар хотод сарын 200-280 мянган төгрөг, орон нутагт 140-230 мянган төгрөг, байхаар тусгасан. Дээрх үнийг ҮСХ-оос гаргадаг өрхийн орлогын төвшингийн өөрчлөлтөөс хамаарч 1-2 жил тутамд шинэчлэн тогтоож байхаар мөн журамд тусгасан. “Түрээсийн орон сууц” хөтөлбөрт 5 хүртэлх жилээр гэрээ хийн хамрагдах боломжтой бөгөөд хүсэлтээ ТОСК-д хүргүүлэх ёстой гэв.

Энэ үеэр УИХ-ын гишүүн Д.Сарангэрэл “Түрээсийн орон сууц” хөтөлбөрт хамрагдсан иргэд байраа өөрийн болгож болох талаар, мөн бэлэн болж буй 360 айлын орон сууцыг иргэдэд шуурхай хүргэх ямар төлөвлөгөө байгаа талаар тодрууллаа. ТОСК-ийн удирдлагууд энэ асуудлыг ойрын хугацаанд шийдвэрлэх боломжтой гэв. Энэхүү хөтөлбөрт хамрагдсан иргэд тухайн орон сууцны төлбөрийг төлж хувьчилж авах  боломжтойг ч тэд дурьдсан. Энэ жилдээ  972 айлын орон сууц ашиглалтад оруулахаар ажиллаж байгаа аж.

УИХ-ын гишүүн Б.Энх-Амгалан уг хөтөлбөрт хамрагдах иргэдийг судалсан эсэх талаар тодруулсан юм. Мөн тэрээр түрээсийн орон сууц, газар  цэцэрлэг зэрэг нийгмийн чухал асуудлуудыг азын сугалаагаар шийдвэрлээд байдаг асуудлаа болих хэрэгтэйг  зөвлөв.  Барилга, хот байгуулалтын дэд сайд Ш.Лхамсүрэн энэ хөтөлбөрт хамрагдах иргэдийн хүсэлтийг Нийслэлд шилжүүлэх төлөвтэй байгаагаа энэ үеэр дуулгасан.

Эх сурвалж: www.polit.mn