Ч. ДАВААНЯМ

Өнгөрсөн арванхоёрдугаар сард БГД-ийн 23 хорооны ИНХ-ыг Монгол Улсын Үндсэн хууль , Монгол Улсын засаг захиргаа, нутаг дэвсгэрийн нэгж, түүний удирдлагын тухай хууль болон бусад хууль тогтоомжуудыг ноцтой зөрчин хороодын иргэдэд зарлан мэдэгдэлгүйгээр нууцаар хуралдуулж ИНХ-н дарга, тэргүүлэгчид, хороодын Засаг даргыг хууль бусаар сонгожээ. Энэхүү хууль бус үйл ажиллагааны талаар БГД-ийн 23 хорооны иргэдээс ДИТХ-ын төлөөлөгчдөд  4000 гаруй иргэний гарын үсэг бүхий 300 гаруй санал гомдол иржээ.

БГД-ийн ИТХ-ын тэргүүлэгч Ж. Баатар  “БГД-т олон хууль зөрчсөн үйл ажиллагаа явагдсаар байна. Өнгөрсөн оны арванхоёрдугаар сарын 24, 25-ны өдрүүдэд хороодын ИНХ-ыг хууль бусаар хуралдуулж ИНХ-ын дарга, тэргүүлэгчид, хороодын Засаг дарга нарыг хууль бусаар сонгосон. БГД-ийн Засаг дарга С. Одонтуяа нь үүрэгт ажилдаа томилогдсон эхний долоо хоногт 10 хорооны Засаг даргын ажлын тайланг тавиулахгүйгээр хорооны Засаг даргын  үүрэг гүйцэтгэгчээр томилсон. Тиймээс энэхүү хууль зөрчсөн үйл ажиллагааг нэн даруй зогсоож, БГД-ийн 23 хорооны ИНХ-ыг хууль дүрмийн дагуу зарлан хуралдуулахыг шаардаж байна. Хэрэв энэ асуудлыг  хуулийн дагуу шийдэхгүй бол дүүргийнхээ 200 мянга гаруй иргэдтэйгээ хамтарч  дараагийн шатны байгууллагад хандах болно ”гэж мэдэгдлээ.

БГД-ийн 23 хороонд ИНХ-ыг хууль бусаар хийхдээ  иргэдийн сонгох сонгогдох эрх, санал бодлоо илэрхийлэх эрхийг зөрчжээ. БГД-ийн 21 дүгээр хорооны иргэн Л. Баттулга “Иргэд хороонд хийгдэж байгаа болон хийгдэх ажилд санал оруулах эрхтэй. Хорооны ИНХ-ыг иргэдэд урьдчилан зарлалгүйгээр 20 минутанд хийсэн. Үүнийг урьдчилан зохион байгуулалттай хийсэн гэж үзэж байна” гэв.

Эх сурвалж: www.polit.mn