Б.ДАМДИН-ОЧИР

Өнгөрсөн долооо хоногт аймаг,  нийслэлийн  ИТХ-ын дарга, Засаг дарга нарын семинар Төрийн ордонд боллоо. Албан ёсны нэр нь “Засгийн газрын үйл ажиллагааны мөрийн хөтөлбөрийг хэрэгжүүлэх, цаашид хэрхэн хамтран ажиллах талаар санал бодлоо солилцох” гэж байв. Энэ хүрээнд аймгийн дарга нар салбар салбарын сайд, дарга нартай уулзаж, аймаг орон нутагтаа тулгамдаж буй асуудлыг хэрхэн шийдвэрлэх тухай ярилцсан. Гэхдээ яриа, зөвлөгөөний ихэнх нь хэмнэлтийн тухай байв. Гэвч хөдөө орон нутагт боловсролын салбартай холбоотой асуудал их байгааг аймгийн Засаг дарга нар хэлж байсан. Тэд Боловсролын сайд Ж.Батсуурьтай уулзах үеэрээ аймгийнхаа сургууль, цэцэрлэгийн хүрэлцээ хангамж, шинэ барилга байгууламжийн асуудал, дутуу барьсан, он дамжсан царцсан барилгуудыг хэрхэн шийдвэрлэх талаар асууж, сураглаж байв. Мөн хөдөөд залуу багш нарын мэдлэг, ур чадвар хангалтгүй байна. Хувийн хэвшлийн цэцэрлэгийн хувьсах зардлыг нэмэх боломжой юу. Улсын  цэцэрлэгийн хүүхдийн хоолны асуудлыг шийдэхэд төсөв мөнгө хүрэлцэхгүй байна гэх мэтчилэнгийн зовлон тоочсон. Харин Ж.Батсуурь сайд үүнд нь тун цөөн үгээр хариулна лээ. Тэрээр “...Аймгуудад баригдсан усан бассейны асуудлыг шийдвэрлэхдээ өөрөөс нь орлого олоод санхүүжүүлэх хэрэгтэй”, “...Багш нарын мэдлэг ур чадварын асуудлыг чанаржуулах талаар бүх багш нараас шалгалт аваад, алдаатай бичдэг, асуудалтай багш нарыг ажлаас нь хал”, “...“Цөм”хөтөлбөр гэж гоё, сайхан нэрнээс цаашгүй, хүүхдүүдийг хичээлээр дарахаас өөр зүйлгүй”, “...Ер нь төсөв хүндрэлтэй байгаа учраас цэцэрлэгийн хүүхдийн хоолны асуудлыг өөрсдөө аргал гэдгийг эндээс манай дарга  нар хүртэл хэлж байна. Тэр хүүхэд гэртээ байсан ч, цэцэрлэгт байсан ч хоол иднэ.  Тиймээс төсөв, мөнгө нь хүрэлцэхгүй байгаа бол эцэг, эхчүүдээс нь  ганц нэг бяруу тоншоод, хүүхдийнх нь хоолных нь асуудлыг шийдвэрлэ л дээ” хэмээн зөвлөв. Юутай аймаг, нийслэлийн дарга нар эрхэм сайдаас ийм чиглэл авлаа. Нутагтаа очоод ажил хариуцсан хүмүүс хийгээд эцэг эхчүүд яаж хүлээж авах бол?

Эх сурвалж: www.polit.mn