Б.ТУУЛ

"Consumer Electronics Show" буюу Хэрэглэгчдэд зориулсан цахилгаан бараа төдийгүй, орчин үеийн хамгийн дэвшилтэт техник технологийн бүтээлүүдийг танилцуулдаг олон улсын хамгийн том үзэсгэлэн яармаг Лас Вегас хотноо нээлтээ хийлээ.

Уг үзэсгэлэн яармаг нь анх 1967 онд АНУ-ын Калифорни мужийн Лас-Вегас хотноо зохион байгуулагдсанаас хойш энэ жил 50 дахь удаагаа болж буй юм байна. Энэхүү үзэсгэлэн яармагт дан ганц цахилгаан бараа, техник тоног төхөөрөмж үйлдвэрлэгч компаниудаас гадна авто машин үйлдвэрлэгч дэлхийн томоохон компаниуд оролцдог юм. Өнгөрөгч 2015 онд Шанхай хотноо анх удаа тус үзэсгэлэн яармагийн салбар болох "Consumer Electronics Show Asia" зохион байгуулагдсан. Энэ жилийн үзэсгэлэн яармаг 265 мянган шоо дөрвөлжин метр талбайд зохион байгуулагдаж байгаа бөгөөд нийт 1300 орчим компани өөрсдийн бүтээгдэхүүн болон технологийг танилцуулан оролцож байна.

Харин энэ удаагийн үзэсгэлэнгийн олны анхаарлыг татаж байгаа бүтээгдэхүүн бол өндөр нягтаршилтай телевизор, дрон, мөн өөрөө жолоодох системтэй буюу автомат жолоодлоготой авто машинууд байгаа юм. Түүнчлэн гар утасны хувьд БНХАУ-ын гар утас, цахилгаан бараа үйлдвэрлэгч "Хуавей" компани өөрийн шинэ загварын "honor X6" хэмээх ухаалаг гар утсаа танилцуулсан нь олны анхаарлыг татаж байна. "Хуавей" энэхүү ухаалаг утсаа өнгөрөгч 10 дугаар сараас Азийн зах зээлд гаргасан бол Европ, Америкийн орнуудад үзэсгэлэнгийн үеэр худалдаанд гаргаж байгаагаа зарлалаа.Үнийн хувьд АНУ-д 249 америк доллараар худалдаалах бол Европт 249 еврогийн үнэтэй байх юм. Үзэсгэлэн яармаг энэ сарын 8-ныг дуустал Лас-Вегас хотноо үргэлжилнэ.

Эх сурвалж: www.polit.mn