Б.ЗАЯА

С.Зоригийг хөнөөсөн хэрэгт холбогдсон Ц.Амгаланбаатар нарт анхан шатны шүүхээс оны өмнө ял оноосон. Ц.Амгаланбаатар, Б.Содномдаржаа, Т.Чимгээ нарыг захиалгаар шунахайн сэдэлтээр уг хэргийг онц хэрцгий аргаар үйлдсэн гэж шүүхийн тогтоолд дурдсан. Мөн нэрт улстөрчийн аминд хүрсэн хэргийг нуун далдлахын тулд нэг гэр бүлийн дөрвөн хүнийг шатааж хөнөөсөн хэргийг ч давхар үйлдсэнийг Ерөнхий прокурор М.Энх-Амгалан мэдэгдсэн юм.

Анхан шатны шүүхийн шийдвэрээр Ц.Амгаланбаатар нарын гурван хүн ял сонсоод өнгөрсөн нь олон нийтийн гайхашралыг төрүүлсэн билээ. Учир нь 18 жилийн турш улс төрийн захиалгат аллага гэж хууль шүүхийнхнээс эхлэн улстөрчид хүртэл мэдэгдэж байсан уг хэргийг шүүх болоход захиалагч тодроогүй. Түүнчлэн хэрэгт яллагдагчаар татагдсан Э.Бат-Үүл, Б.Булган нар шүүх хуралд гэрч, хохирогч, холбогдогч аль алиных нь байр суурьнаас оролцоогүй нь эргэлзээ төрүүлээд буй.

Тэгвэл Улсын ерөнхий прокурорын газраас С.Зоригийг хөнөөсөн хэргийг захиалагчийг илрүүлэх ажлын хэсэг байгуулжээ. Тодруулбал, Ц.Амгаланбаатар нарын хэргээс С.Зоригийн амь насанд халдахыг захиалсан, зохион байгуулсан гэх хэргийг тусгаарласан байна. Хамтарсан ажлын хэсэгт Тагнуулын Ерөнхий газрын мөрдөн байцаах хэлтэс, Цагдаагийн Ерөнхий газрын Мөрдөн байцаах газрын Онц хүнд гэмт хэрэг мөрдөх хэлтсийн мөрдөн байцаагчдын бүрэлдэхүүн багтжээ. Уг хэрэгт Нийслэлийн прокурорын газраас хяналт тавих бөгөөд хэргийг шуурхай шалгаж, шийдвэрлэхийг Ерөнхий прокурор М.Энх-Амгалан ажлын хэсэгт үүрэг болгожээ.

 Эх сурвалж: www.polit.mn