Л.ХЭРЛЭН

УИХ-ын намрын ээлжит чуулганы энэ сарын 26-28-ны хуваариар УИХ дахь  намын бүлгүүд  маргааш 10 цагт хуралдана. Ардын намын бүлэг хоёр асуудал хэлэлцэнэ гэсний эхнийх нь Б.Жавхлан гишүүний оруулсан Хөгжлийн банкны тухай,  хоёр дахь нь “бусад”  гэж томъёолсон тодорхойгүй асуудал байна. Баттай эх сурвалжийн мэдээлснээр маргааш  өглөө МАН-ын бүлэг Тавантолгойн асуудлыг хэлэлцэх юм байна. Бүлгийн хурал нэлээд өргөтгөсөн байдалд болох  бололтой.  Учир нь Тавантолгойн гэрээ хэлцлийг хөшгигний цаана эхлүүлээд байгаа Уул уурхайн сайд Ц.Дашдоржоор ахлуулан  Засгийн газраас 18 хүний бүрэлдэхүүнтэй томилсон  Ажлын хэсгийнхнийг оролцуулж мэдээлэл сонсох юм байна.

Хэвлэл, мэдээллээр дуулдаж буй мэдээллээр бол Тавантолгойн түншүүдийн гэрээ хэлцэл  хөшигний ард явагдаад эхэлчихсэн. Үүнд Засгийн газар, Энержи Ресурс, Хятадын Шинхуа групп, Японы  “Сумитома” корпораци оролцож байгаа. 49 хувийг хэрхэх вэ гэдэг хутганы ирэн дээрх эмзэг асуудал. Монголчууд ашиг хүртэж чадах уу гэдэг асуулт дагуулсан хүлээлт үүсгээд байгаа. Олон нийтийн зүгээс 49 хувиас  Засгийн газар   Хятадын “Чалко” –д өрөндөө суутгаад, 400 сая ам.доллар авснаар бараг зүгээр өгсөнтэй адил наймаа явагдах гэж байна гэсэн хардлага бий. Хардлага ч гэж ийм зүйл өрнөөд байна гэдгийг хэвлэлүүд зах зухаас нь  сөхөж ил болгохын төлөө   байгаа. Тэгвэл явж явж  хөшигний ард Тавантолгойн 51 хувийг эзэмших Монголын талын хөрөнгө оруулагчаар MCS буюу “Нүүрсчдийн нам”  тодорсон гэсэн барим тавим мэдээлэл ч ил болчихоод байна. Асуудлыг гол судсыг барьж, хүрд эргүүлж байгаа субьект нь  Засгийн газар, Ардын нам. Монголын ард түмний баялгаар эрх баригчид хэрхэн дүрэмгүй тоглох нь маргааш болох Ардын намын бүлгийн хурлаар  үргэлжлэх бололтой.

Эх сурвалж: www.polit.mn