Монгол Улсын нийт хүн амын 35.5 хувийг өсвөр үе, залуучууд эзэлдэг бөгөөд жилд 180 мянга орчим оюутан 100 гаруй их дээд сургууль, коллежид суралцдаг байна. Тэгвэл эдгээр оюутан, залуучуудыг улс орны эдийн засаг, нийгмийн амьдралд байр суурь эзлүүлэх, ирээдүйн залуу удирдагч, нийгмийн зүтгэлтэн, чадварлаг мэргэжилтэн төрөн гарахад дэмжлэг үзүүлэх, тэднийг олон нийтэд таниулах зорилготой “Алма матер” оны шилдэг оюутан шалгаруулах ёслолын арга хэмжээг Монголын Залуучуудын Холбоо 16 дахь жилдлээ зохион байгуулж байна.
Оюутан залуучуудын дунд хамгийн нэр хүндтэй, шударга шалгаруулалттай хэмээн онцлогддог уг арга хэмжээг 1996 оноос эхлэн зохион байгуулсан бөгөөд он оны шилдгээр УИХ-ын гишүүн Н.Учрал, Соёмбо академийн Ерөнхий захирал А.Санжмятав, НЗД-ын орлогч Ж.Батбаясгалан, Нийгмийн эрүүл мэндийн хүрээлэнгийн захирал Б.Цогтбаатар зэрэг салбар бүрийн манлайлагч залуус тодорч байжээ.
Энэ жил сүүлийн таван жил завсарлаад байсан “Алма матер” оны шилдэг оюутан шалгаруулах ёслолын ажиллагааг ахин сэргээж, эдийн засаг, нийгмийн ухаан, анагаах ухаан, техник технологи, урлаг спорт, боловсрол, хүмүүнлэгийн зэрэг 12 номинациар шилдгүүдийг тодруулж байна. Их дээд сургуулиудаас 200 гаруй шилдэг оюутны материал ирсэн бөгөөд шилдгийн шилдэг 12 оюутан шүүгчдийн шалгуураар шалгарсан юм.
Шүүгчдийн бүрэлдэхүүнд УИХ-ын дарга асан, доктор, профессор С.Төмөр-Очир, МУ-ын гавьяат багш Ц.Түвшинтөгс, Соёмбо академийн ерөнхий захирал А.Санжмятав, Зууны мэдээ сонины ерөнхий эрхлэгч Б.Отгонбаяр, МЗХ-ны Дэд Ерөнхийлөгч У.Басбиш, МЗХ-ны нарийн бичгийн дарга Б.Эрдэнэбат, МУИС-ийн Оюутны албаны дарга О.Алтангэрэл нар ажиллалаа.
“Алма матер” оны шилдэг оюутнуудад сурлагын голчоос гадна Залуучуудын байгууллагаас зохион байгуулсан олон нийтийн ажлуудад санаачлагатай оролцож амжилт гаргасан байх, Улсын болон олон улсын тэмцээн уралдаан, эрдэм шинжилгээний хурал, урлаг спортын арга хэмжээнд анги хамт олон, сургууль, улсын нэрийн өмнөөс оролцож үнэмлэхүй амжилт гаргасан байх зэрэг шаардлагыг тавьсан байна.
Оны шилдэг оюутнууд нь МЗХ-оос гаргасан “Тэргүүний оюутан” алтан медалийн анхны эзэд болох юм.
Дэлгэрэнгүй мэдээллийг МЗХ-ны myf.mn сайт болон хэвлэлийн төлөөлөгч Ч. Гантуяа /88020633/, Ахлах мэргэжилтэн Б. Төрболд /99793139/ нараас лавлана уу.