Н.ДАЯН

“Иргэдээ өмөөрч бичнэ” буланд маань энэ удаа “Арга билиг” хараагүй иргэдийн эрх ашгийг хамгаалах холбооны зохицуулагч И.Нарантуяа хандсан юм. Тэрээр “Нэг нүд нь хараагүй 18-50 насны 329 иргэнийг Эрүүл мэнд, Нийгмийн хамгааллын сайдын шийдвэрээр группээс хаслаа. Иймд бид нэгдэж холбоо байгуулсан. Энэ хүмүүс группын мөнгөөр амьдралаа авч явдаг ч өнөөдөр 140 мянган төгрөгөөр амьдрах боломжтой хүн нийгэмд цөөхөн байгаа. Гэтэл дэлхий нийтийн жишигт тохируулан энэ хүмүүсийг группээс нь хаслаа гэсэн. Дэлхий нийт маань өнөөдөр хөгжлийн бэрхшээлтэй хүмүүсээ сурч, амьдрах орчноор нь хангадаг. Гэтэл манайх дэлхийн жишигт хамрагдах боломжгүй” гэв.

Өнөөдөр Монгол Улсад харааны бэрхшээлтэй 3174 хүн байдаг. Үүнээс 329 нь группээсээ хасагджээ. Тэд нэгдэж төрийн болон төрийн бус байгууллагуудад хандсан  ч “болохгүй” гэдэг шийдвэрийг сонсчээ. Хамгийн сүүлд дэлхийн жишигт нийцүүлээд энэ хүмүүсийг тусгаарлаж байгаа гэсэн хариултыг өглөө. Тиймээс дэлхий нийтийн жишигт нь тааруулъя гээд доктор, профессор Н.Уранчимэг гэдэг эмчид үзүүлээд буцаж групптээ орох ёстой юм байна. Энэ эмчтэй уулзахад “Танай хүүхдийг магадлах комиссоор оруулна. Тиймээс та 40 мянган төгрөг төлж байж надтай уулз. Хэрэв зөв яривал танай хүүхэд, энэ хүмүүс группт орно. Харин буруу яривал орохгүй” гэжээ.

Группт байсан хүмүүсийн дотор ажил хийдэг хүн нэг ч байхгүй. Өнөөдөр та харааны бэрхшээлтэй юм байна энэ ажилд ор гээд ажил нь байж байвал энэ хүмүүс группт орохгүй ажил хийх боломжтой. Гэтэл нөхцөл, боломжийг нь бүрдүүлээгүй байж “Дэлхий нийтийн жишигт тохирууллаа” гэж хэлж болохгүй. Яагаад сайд, дарга нарынхаа цалинг хасахгүй байж 140 мянган төгрөг авдаг хүмүүсийн эрхийг хасч байгаа юм бэ. Энэ хэлмэгдүүлэлт үү эсвэл ялгаварлан гадуурхалт уу гэдгийг ойлгохгүй байна гэсэн юм.