ОХУ-ын Элчин сайдын Яамны дипломат ажилтан “Аз жаргалтай Улаанбаатар” цэнгээний үеэр "Хар сарнай" хамтлагийн ахлагч С.Амармандахыг зодсон хэрэг гарсан. Түүнээс хойш С.Амармандахын ар гэрийнхэн болон өмгөөлөгч нь мэдээлэл өгч, улмаар  хоёр улсын харилцааны төвшний асуудал хөндөгдөж эхэлсэн. Гадны хэвлэлүүд ч дээрх асуудлыг онцолж байв. Тэгвэл олны анхаарлын төвд орж монголчуудын бухимдлыг төрүүлээд буй үйлдэлд дуучин тайлбар хийжээ. Ухаан ороод удаагүй байгаа тэрээр “Хэвлэл мэдээлэл, фэйсбүүкээр миний болон миний гэр бүлийн нэр төрд халдсан гүтгэлэг гарч байгаад харамсаж байна. Сэтгэл зүрх өвдөж байна.  “Аз жаргалтай Улаанбаатар” арга хэмжээний үеэр хоёр хүний хооронд болсон явдалд Нийслэлийн засаг дарга С.Батболд, ИТХ-ын дарга Ц.Сандуй нарыг буруутгахаа болихыг уриалж байна. Би өөрөө Орос хүмүүжлээр хүмүүжсэн.

Намайг их муухай гүтгэсэн байсан. Би баяр ёслол дээр “Хай Гитлер” гэж хэлээгүй. Манай хас хээ 5,000 жилийн түүхтэй, Монголын их хаадууд бүгдээрээ хас тэмдгийг шүтэж ирсэн. Би өөрийгөө тэнгэрийн тамга шүтэж явдаг гэж боддог. Дуугаа дуулчихаад гарч явах үед гадаадын иргэн гэнэт араас хүнд төмрөөр цохисон.Намайг цохисон гээд байгаа хүний талаар би мэдэхгүй, танихгүй. Би тэр хүнтэй ерөөсөө муудаагүй. Тайзнаас буугаад гарч явах үед энэ гэнэтийн дайралт болсонд би харамсаж байгаа. Намайг харанхуй өрөө рүү чирч оруулсан гэдэг мэдээлэл худал. Хоёр хүний зодооноос болж ах дүүгийн найрамдалт харилцаа сэвтэх ёсгүй. Нэг хүнээс болж аугаа Орос гүрний хүмүүс муу хэлэгдэх ёсгүй. 300 сая төгрөг нэхсэн гэдэг бол худлаа гүтгэлэг, доромжлол” хэмээжээ.

Эх сурвалж: TV5 телевиз