С.САРУУЛ

Монгол Улсын Ерөнхийлөгч Ц.Элбэгдорж өнөөдөр /2016.12.09/ Төрийн Соёрхол хүртээлээ. Шагнал гардуулах үеэр Төрийн Соёрхолт Ж.Дашдондог “Морин цагт Монгол Улсын Ерөнхийлөгч миний энгэр дээр төрийн дээд шагнал зүүж өглөө. Олон юм бодогдож байна. 17 настай байхад миний анхны номыг Булган аймагт очиж улсын хэвлэлээр гаргаад шүлгийн моринд мордуулсан Д.Содномдорж гэдэг хүн маань дурсагдаж байна. Мөн Есөнбулагаас миний анхны номын талаар захиа бичсэн Л.Түдэв маань дурсагдаж байна. Төрийн шагналын номын жагсаалтад миний “Аав Ээж Би” гэдэг ном багтлаа. Энэ номыг аав, ээж дүүтэй хамтарч зохиосон. Тиймээс манай гэр бүлийн ном Монголын олон айлын гэр бүлийн ном болж өргөжсөнд баяртай байна. Намайг жаахан гутруу явахад ээж “Миний хүү хэзээ нэгэн цагт Төрийн шагнал авна” гэж хэлж байсан. Ээж минь ямар алсыг хараа вэ хэмээн ээж, аавыгаа бодоод зогсч байна. Их том урам зориг өглөө. Цаана нь уран бүтээлийн том өндөрлөг байгаа гэж харж байгаа. Төрөөс хайрласан энэ сайхан урам зоригоор шүлгийн морио нэг сайн гуядаж морьтой үлгэрээ хөтөлж аваад шинэ уран бүтээл рүү явах замдаа гарна даа. Хүүхдүүдэд баярлалаа. Хүүхэдтэй хамт энэ шагналыг авч байна гэж ойлголоо. Миний зохиолыг уншиж надад олон жил урам өгсөн Монголынхоо хүүхдүүдэд талархлаа. Өнгөрсөн хугацаанд 100 орчим ном бичлээ.Хүүхдийн зохиол чинь ботгоны мөр шиг нимгэхэн учраас боть болж өгөхгүй шүү дээ. Гадаадад 30-аад ном хэвлэгдсэн. Англи, Халимагийн сурах бичигт миний үлгэр орсон” гэлээ.

Эх сурвалж: www.polit.mn