Т.ДАЛАЙ

“Мэдлэгээ түгээцгээе: Газар хөдлөлтийн гамшгийн эрсдэлийг бууруулахад олон нийтийн оролцоо ба хариуцлага” сэдэвт үндэсний семинар өнөөдөр /12.06/ Төрийн ордонд боллоо. Уг семинарт оролцогчдод хандан Монгол Улсын Ерөнхийлөгчийн Тамгын газрын дарга Ц.Баярсайхан үг хэллээ. Тэрээр “Ерөнхийлөгч Ц.Элбэгдоржийн анхаарлаа хандуулж ирсэн нэгэн гол ажил бол газар хөдлөлтийн гамшгаас хамгаалах, урьдчилан сэргийлэхэд төрийн бодлого, үйл ажиллагааг чиглүүлсэн явдал байсан. 2010 онд Гайти улсад газар хөдлөлт болж, олон зуун мянган хүний амь нас, эрүүл мэнд, эд материалын хохирол учирсан билээ. Үүнээс 10 хоногийн дараа буюу 2010 оны нэгдүгээр сарын 22-нд Монгол Улсын үндэсний аюулгүй байдлын зөвлөл хуралдсан байдаг.  Хурлаар Улаанбаатар хот орчмын газар хөдлөлтийн төлөв байдал газар хөдлөлт болон бусад төрлийн гэнэтийн гамшгийн өмнө сөрж зогсох бэлэн байдлын талаар хэлэлцэн, газар хөдлөлтийн төлөв байдлыг нарийвчлан судлах зэрэг асуудлыг авч хэлэлцэн шийдэлд хүрсэн. Мөн гамшгаас хамгаалах төрийн ой санамжийг тогтоохын тулд жил бүрийн нэгдүгээр сарын 22-нд газар хөдлөлтийн төлөв байдал, түүний гамшгийн эрсдлээс урьдчилан сэргийлэх ажлын явц, үр дүнг тайлагнаж байх үүргийг өгсөн” гэлээ. Мөн онд Ерөнхийлөгчийн санаачилгаар боловсруулж батлагдсан Монгол Улсын Үндэсний аюулгүй байдлын үзэл баримтлалд монгол хүний эрүүл, аюулгүй амьдрах таатай орчин, нөхцөлийг бүрдүүлэх талаар тодорхой заалтуудыг тусгасан байна.  Мөн саяхан Улаанбаатар хотод Гамшгаас хамгаалах сургалт, дадлагын төвийг шинээр байгуулсан нь мэргэжлийн аврагчид дадлага сургуулилт хийж, мэргэжлийн ур чадвараа байнга дээшлүүлж байхаас гадна жирийн иргэд, оюутан, сурагч, хүүхэд багачууд ч газар хөдлөлт, гал түймэр зэрэг гамшгийн хор хөнөөлийг бодитоор мэдэрч, түүнээс өөрийгөө болон бусдыг аврах арга туршлагад суралцах боломжийг бүрдүүлж байна” гэсэн юм.

Эх сурвалж:www.polit.mn