Р.Оюун

Монголын гэр бүлийн сайн сайхны нийгэмлэг, Залуучуудын үе тэнгийн боловсролын үндэсний сүлжээ “Y-PEER” клубээс өсвөр насны охидын эрүүл мэндэд тулгамдаж буй асуудлаар хэвлэл мэдээллийнхэнд хандсан юм. Тус сүлжээнээс зургаа дахь удаагийн Олон улсын 10 хоногийн аяныг дэлхийн 50 гаруй улс оронтой зэрэгцэн төрийн болон төрийн бус, залуучуудын байгууллагуудтай хамтран “Өсвөр үеийнхэн ба охидын эрүүл мэнд, эрхийн асуудалд залуучуудыг дайчлах нь” уриан дор зохион байгуулж байна.

Үндэсний статистикийн хорооны 2014 оны мэдээгээр Монгол Улсын хүн амын 36.2 хувь нь 19-өөс доош насны хүүхэд, залуучууд, 8.2 хувь нь 15-19 насны өсвөр үеийнхэн байна. Мөн 15-19 насны гэрлэсэн эмэгтэйчүүдийн 74.5 хувь нь хүүхэд төрүүлсэн буюу анхны хүүхдээ тээж, дунджаар 0.6 нь хүүхэд төрүүлжээ. Өсвөр насны охид жирэмсний болон төрөлтийн хүндрэлийн улмаас эндэх эрсдэлтэй бөгөөд энэ нь хөгжиж буй орнуудад өсвөр насны охидын нас баралтын тэргүүлэх шалтгаан болж байна гэсэн юм. Аян энэ сарын 10-ныг хүртэл үргэлжлэх ажээ.

Эх сурвалж:www.polit.mn