Т.БАТСАЙХАН

“Монгол кино хөгжүүлэх сан”-гаас санаачлан  “IMAX” кино театртай хамтран эрхэм хүндтэй  хүмүүсийг урьж цувралаар лекц зохион байгуулахаар болсон билээ.  Анхны зочноор Монгол Улсын 18 дахь Ерөнхий сайд Д.Бямбасүрэн оролцож, “Хүн байхын учир, Залуусын үүрэг хариуцлага” сэдвээр лекц уншлаа. Түүний лекцийг сонсохоор “Хууль сахиулахын их сургууль”-ийн сонсогчид, “Шинэ Монгол” ахлах сургуулийн төгсөх ангийн сурагчид гээд 200 гаруй хүн хуран цугласан байв.   Д.Бямбасүрэн гуай   яруу найрагч Б.Явуухулангийн “Би хаана төрөө вэ” шүлгээр лекцээ эхэллээ. Тэрээр социолизмоос ардчилсан нийгэм рүү шилжин ороход гарч байсан хүндрэл бэрхшээл хийгээд амжилттай зүйл юу байсан одоогийн залууст ярьж өглөө.  Түүний лекцийн хүн байхын учир хэсгийг сийрүүлэн хүргэж байна.

“Генрик Гесс “Нийгмийн солигдох болон хоёр иргэншил мөргөлдөхөд хүний зовлон туйлдаа хүрдэг”  гэж хэлсэн байдаг. Тэгвэл бид нэг зуунд гурван удаа хувьсгал хийж, нийгмээ хоёр удаа сольсон. Гэхдээ энхийн замаар хувьсгал хийж, нийгмээ  сольж байсан. Энэ нь XX зуунд хүн төрлөхтөнд монголчуудын ойлгуулж ухааруулсан нэг том ухаарал юм.  Хүн төрлөхтөнд, аль ч улс оронд, аль ч үеийнхэнд дэвссэн хивс, тавагласан хоол заяадаггүй юм. Цаг үе бүхэн өөрийнхөө тулгарсан бэрхшээлийг давж амьдралын замыг залгадаг юм. Тиймээс өнөөдрийн нийгэмд тулгараад байгаа хүнд хэцүү бүхнийг даван туулж, арилгах нь Монгол хүн бүрийн амьдралын утга учир. Өвөг дээдэс маань баатарлаг гавьяа байгуулж, одоогийн Монгол орныг монгол чигээр нь та бүхэнд хүлээлгэн өгч байна. Эзэн нь бай та нар. Бид монгол заяагаа тээж, монгол угсаатныхаа соёлыг хадгалж, хойч үедээ өвлүүлэхийн төлөө төрсөн хүмүүс. Хүнд хүндрэл бэрхшээл тохиолдоно. Үүнийг оюун ухаан, эв нэгдлээрээ, сайн сайханд тэмүүлсэн тэмүүллээр даван туулаарай. Бид бүхэн та бүхний амьдралын чинь ном болж явах болтугай гэж байв.  Тэрээр энэхүү лекцийнхээ дундуур Б.Явуухулангийн “Би хаана төрөө вэ”,  Д.Пүрэвдорж “Орчлонд би азтай төржээ” хэмээх хоёр ч шүлгийн хэсгээс дуудаж байв.  Ийнхүү эрхэм хүмүүний лекц харилцан яриагаар үргэлжилж, залуус сонирхсон асуултдаа хариулт авсан юм.  Түүнийг хүрэлцэн ирж залуу үедээ үнэтэй сургамжаа хайрлан, чин сэтгэлээсээ ярилцсанд “Нью тур сафарис” компанийн захирал О.Батханд талархал илэрхийлж, дурсгалын зүйл гардуулсан юм.

Эх сурвалж:www.polit.mn