Б.ОЮУН-ЭРДЭНЭ

Монгол Улсын хөдөлмөрийн баатар, гавъяат багш Дорлигын Дагвын мэндэлсний 100 жилийн ойг тэмдэглэлээ. Тэрээр Завхан аймгийн Түдэвтэй сумын уугуул бөгөөд сурган хүмүүжүүлэх ухааны тулгын чулууг тавилцаж байсан аж. Хүндэтгэлийн үйл ажиллагаанд аймгийн Засаг дарга Д.Батсайхан, Засаг даргын орлогч Ч.Пунцаг, аймгийн Засаг даргын тамгын газрын Нийгмийн бодлогын хэлтсийн дарга А.Шаравжамц болон Дагва багшийн үр хүүхдүүд, багш сурган хүмүүжүүлэгчид, сурагчид оролцлоо.

Гавьяат багш Д.Дагва сайн зохион байгуулагч төдийгүй зохиолч, яруу найрагч, найруулагч, жүжигчин, хөгжимчин, зураач, барималч гээд олон талын мэдлэг, авьяастай хөдөлмөрч сурган хүмүүжүүлэгч байжээ.

Д.Дагва багшийг дурсан санах, бахархан дуурайх, сурталчлан таниулах “ЭЛСЭН ДООРХ БҮРЭЭН ДУУ” оюуны наадмыг Завхан аймгийн Засаг даргын Тамгын газар дэмжин ажиллалаа.  Дагва судлалын чиглэлээр эссэ бичих, түүний зохиосон шүлгүүдийг мэдэх, уран унших зэрэг төрлүүдэд 29 сургуулийн 14100 суралцагч таван насны ангилалаар оролцжээ. Шилдэг 345 оролцогч наадмын хоёрын даваанд бүтээлээ ирүүлэн оюун ухаан, ур чадвар, авьяас билгээ сорьсон байна. Мөн багш сурган хүмүүжүүлэгчдийн дунд зохион байгуулсан  “Хөдөлмөрийн баатар, Гавьяат багш Дорлигын Дагва судлал” сэдэвт онол арга зүйн илтгэл бичих уралдааны эхний шалгаруулалтад 29 сургуулийн 356 багшийн 91 илтгэл оролцсоноос шилдэг 29 илтгэл хоёрын даваанд шалгарсан юм.

Наадмын шилдгүүдэд аймгийн удирдлагууд болон түүний үр хүүхдүүд шагналыг нь гардуулан өглөө. Мөн энэ үеэр түүний ажиллаж байсан сургуулиуд амьдрал, уран бүтээлийнх нь түүхийг өгүүлсэн сонирхолтой үзэсгэлэн гаргасан юм. МУ-ын Хөдөлмөрийн баатар, Гавьяат багш Дорлигын Дагва зургаан хүүхэдтэй. Түүний хоёр хүүхэд өөрийнх нь мэргэжлийг эзэмшсэн байна. Хүндэтгэлийн үйл ажиллагааны үеэр түүний үр хүүхдүүдийг Завхан аймгийн хүндэт тэмдэг, 90 жилийн ойн медалиудаар тус тус шагнаж урамшууллаа.