Б.ОЮУН-ЭРДЭНЭ

Анх 2012 онд орон нутгийн төсвийн 50 сая төгрөгийн хөрөнгө оруулалтаар шавыг нь тавьж байсан Цагаанчулуут сумын ерөнхий боловсролын есөн жилийн дунд сургууль шинэ хичээлийн байртай болж нээлтээ хийлээ. Нээлтийн үйл ажиллагаанд аймгийн Засаг даргын орлогч Б.Ариунаа болон сургуулийн хамт олон, сумын удирдлагууд, сурагч, эцэг эхчүүд оролцлоо. 320 хүүхдийн суудалтай шинэ хичээлийн байрыг улсын төсвийн 1.8 тэрбум төгрөгийн хөрөнгө оруулалтаар дөрвөн жилийн хугацаанд барьж ашиглалтад оруулсан байна.

Цагаанчулуут сумын ерөнхий боловсролын дунд сургууль1953 онд байгуулагдсан бөгөөд 1978 онд 160 хүүхдийн судалтай хичээлийн байр, дотуур байр, спорт заал ашиглалтанд орж байжээ. Ийнхүү 38 жилийн дараа тус сургууль 320 хүүхдийн суудалтай хичээлийн шинэ байртай болж багш сурагчид тохилог орчинд хичээл сургалтаа явуулж илүү хөгжих боломж бүрдээд байгаа юм.

Тус сургуульд одоогоор 180 гаруй хүүхэд суралцдаг бөгөөд цаашид 12 жилийн сургалттай бүрэн дунд сургууль болох зорилт тавин ажиллаж буйгаа сургуулийн удирдлагууд хэллээ. Ингэснээр хүүхдийн тоо нэмэгдэж 300 орчим сурагчтайгаар үйл ажиллагаагаа явуулах тооцоо гаргасан байна.