Б.ОЮУН-ЭРДЭНЭ

Завхан аймгийн 19 сумын ИТХ-ын дарга, Засаг дарга, Засаг даргын Тамгын газрын дарга, Газрын даамлууд нутгийн удирдлагыг чадавхижуулах сургалтад хамрагдлаа. Тус сургалтыг аймгийн ИТХ, Засаг даргын Тамгын газраас зохион байгуулж буй. Ингэснээр аймгийн хэмжээнд нэгдсэн нэг бодлого, чиглэлтэйгээр сумдын удирдлага ажлынхаа гарааг эхлэх боломжийг бүрдүүлж байгаагаараа ач холбогдолтой юм.

Аймгийн Засаг дарга Д.Батсайхан “Ард иргэдээ сонсох тухай”   хоёр дахь захирамжаа гаргасан. Тиймээс энэ захирамжийн хэрэгжилтийг хангуулах,  иргэдээ сонсч, иргэдээсээ асууж аливаа шийдвэрийг гаргадаг байх хэрэгтэйг хэллээ. Шинээр сонгогдсон сумын удирдлагуудыг хариуцлагатай, хүнд сурталгүй, иргэдтэй ойр, тэдний санал бодлыг сонсдог байхыг сануулав. Мөн шударга авлигаас ангид байх, төрийн залгамж халааг хадгалах, багаар ажиллах, манлайлал, өөрийгөө байнга хөгжүүлэх, шуурхай, цаг хугацааг баримтлах, гүйцэтгэлийн хяналтыг байнга тавьдаг байх зарчим баримталж ажиллахыг аймгийн Засаг дарга үүрэг болголоо.

Ийнхүү сумдын удирдлагууд ажилдаа баримтлах зарчим, хэрхэн үр бүтээлтэй ажиллах нийтлэг дүрэм журам, хууль эрх зүйн ойлголт, албан хэрэг хөтлөлт, ажлын байрны тодорхойлолт, хийж гүйцэтгэх ажлын төлөвлөгөө гээд олон төрлийн мэдээллийг агуулсан цогц сургалтад хамрагдлаа.