Б.ОЮУН-ЭРДЭНЭ

Завхан аймгийн хүнс үйлдвэрлэгчид хоёрдугаар зөвлөгөөнийг зохион байгуулсан байна.  Зөвлөгөөнд аймгийн хэмжээнд хоол үйлдвэрлэл, үйлчилгээний салбарт үйл ажиллагаагаа явуулж буй тогооч, талх, нарийн боов үйлдвэрлэгч нийт 300 орчим төлөөлөгч оролцлоо. Тус зөвлөгөөнийг мэргэжлийн боловсон хүчний мэдлэг, ур чадварыг дээшлүүлэх, орчин үеийн хоол үйлдвэрлэлийн болон үйлчилгээний арга технологиос харилцан туршлага судлах, эрүүл орчинд эрүүл хоол хүнсээр үйлчлэх чадавхийг бүрдүүлэх зорилгоор хийж буйгаа зохион байгуулагчид онцоллоо.

Зөвлөгөөнөөр “Хүнсний тухай болон хүнсний бүтээгдэхүүний аюулгүй байдлын тухай хуулийн хэрэгжилт”,“Хоол үйлдвэрлэлийн ажлын байрны аюулгүй байдлыг хангах”,“Хүнс үйлдвэрлэлийн өнөөгийн байдал, тулгамдаж буй асуудал”,“Хүнсний үйлдвэрлэл эрхлэлтэнд эмэгтэйчүүдийн оролцоо” сэдвээр тус тус илтгэл тавьж хэлэлцүүлжээ. Мөн хүнс үйлдвэрлэгчийн “Ур чадвар-2016” аймгийн аварга шалгаруулах тэмцээн, бүтээлийн үзэсгэлэн худалдааг зохион байгуулж шилдгүүдээ тодруулсан байна.

Дашрамд дурдахад, ард иргэддээ эрүүл  хүнсний бүтээгдэхүүн хэрэглэж хэвшүүлэх, нөгөө талаас дотоодынхоо үйлдвэрлэл эрхлэгчдийг дэмжих зорилгоор аймгийн Засаг дарга “Үндэсний үйлдвэрлэлээ дэмжих тухай” захирамж гаргасан. Захирамжийн хэрэгжилтийг биелүүлэх ажлыг аймгийн Засаг даргын тамгын газар эхлүүлэн орон нутагтаа үйлдвэрлэсэн бүтээгдэхүүнийг худалдан авч хэвшжээ. Цаашид хүнс үйлдвэрлэгчдээ бүтээгдэхүүнээ өөр зах зээл дээр борлуулах боломжийг бүрдүүлэхэд нь аймаг орон нутгийн зүгээс дэмжиж ажиллахаа илэрхийлж байсан юм.